भारतको उत्तरपूर्वी राज्य नागाल्यान्डमा सेनाले गरेको सुरक्षा कारवाहीमा १३ जना निर्दोष सर्वसाधारण मारिएपछि स्थानीय र सुरक्षाकर्मीहरूबीच हिंस्रक भिडन्त भएको छ । 

मोन जिल्लामा सुरक्षाफौजले गश्ती गर्दा सर्वसाधारणलाई सशस्त्र लडाकू भन्ठानेका थिए । 

शनिवार अबेर राति गरेको कारवाही विश्वसनीय सूचनाका आधारमा गरिएको भारतीय सेनाले जनाएको छ । सेनालाई पृथक्तावादी समूह नेसनलिस्ट सोसलिस्ट काउन्सिल अफ नागाल्यान्डका सदस्यहरूको गतिविधिका बारेमा सेनालाई सूचना आएको थियो । 

तिरु क्षेत्रमा सर्वसाधारणहरूलाई ओसारपसार गरिरहेको पिकप ट्रकमा विद्रोही रहेको भन्ठानेर सेनाले गोली चलाएको थियो । 

कोइलाखानीमा काम गर्ने मजदूरहरू गाउँ फर्किरहेको बेलामा घटना भएको हो । घटनामा ११ अन्य व्यक्ति घाइते भएका छन् भने दुईजना हराइरहेका छन् । 

घटनाको जानकारी पाएपछि रिसाएको भीडले सुरक्षाफौजहरूलाई घेरेर निर्दोष मानिस मारेको आरोप लगाएको थियो । स्थिति नियन्त्रणबाहिर पुगेपछि हिंस्रक भिडन्त भयो । 

विरोध गर्ने सातजना घाइते भएको र सैनिकहरूले आत्मरक्षामा गोली चलाएको प्रहरीको भनाइ छ । 

सेना एकजना सैनिक मारिएको र अन्य कैयौं घाइते भएको तथा सुरक्षाफौजहरूले उपयोग गरेका तीनवटा एसयूभीहरूमा आगजनी गरिएको जनाएको छ । 

गृहमन्त्री अमित शाहले घटनाको छानबिन गर्ने आश्वासन दिएका छन् ।