चीनले अफ्रिकी मुलुक इक्वेटोरियल गिनीलाई फकाएर त्यहाँ सैन्य अड्डा बनाउन खोजेको भन्दै अमेरिकाले चेतावनी दिएको छ । 

त्यहाँ चीनले सैन्य अड्डा बनाएमा आन्ध्र महासागरमा बेइजिङले शक्तिप्रदर्शनको मौका पाउनेछ । 

चीनका राष्ट्रपति सी चिनपिङले इक्वेटोरियल गिनीका राष्ट्रपति टियोडोरो ओबियाङ न्गुएमा म्बासोगोलाई बाटा शहरमा रहेको बन्दरगाहलाई सैन्य अड्डा बनाउनका लागि फकाइरहेको अमेरिकाका गुप्तचर अधिकारीहरूले विश्वास गरेका छन् । 

चीनले बाटा बन्दरगाहलाई सैन्य अड्डा बनाएमा चिनियाँहरूको युद्धपोत र अन्य जलसैन्य उपकरणहरू अमेरिकाको ईस्टर्न सीबोर्ड भएको ठाउँमा पुग्नेछन् । 

‘जलक्षेत्रीय सुरक्षाको मामिलालाई कूटनीतिमार्फत सम्बोधन गर्ने क्रममा हामीले इक्वेटोरियल गिनीलाई चिनियाँ गतिविधिका कारण राष्ट्रिय सुरक्षा चिन्ता बढ्ने कुरा बताएका छौं,’ बाइडन प्रशासनका एक वरिष्ठ अधिकारीले द वाल स्ट्रीट जर्नललाई बताए । 

आन्ध्र महासागरमा चीनको सैन्य अड्डा बनेमा अमेरिकाका लागि त्रासदीपूर्ण परिदृश्य बन्ने अमेरिकी अधिकारीहरूको भनाइ छ । 

चीनको आफ्नो भूभागभन्दा बाहिरको सैन्य अड्डा पूर्वी अफ्रिकाको जिबुटीमा छ । उसले सन् २०१७ मा उक्त सैन्य अड्डा खोलेको हो । 

सन् २००९ मा चीनले इक्वेटोरियल गिनीमा रहेको वाणिज्यिक बन्दरगाहलाई स्तरोन्नति गरेको थियो । उक्त देशको राजधानी मालाबो मुख्यभूमिबाट उडानमा एक घन्टा पर पर्छ ।