इंग्ल्यान्ड क्रिकेट टीमका विकेटकीपर जोस बटलरले अस्ट्रेलियाविरुद्धको दोस्रो टेस्टमा बिहीवार अद्भुत क्याच समातेका छन् । 

आफूभन्दा चार फीट पर रहेको बललाई उनले हावामा उडेर एक हातले समातेका हुन् । बटलरले दाहिनेतर्फ डाइभ हानेर मार्कस ह्यारिसलाई आउट पार्ने क्याच समातेका हुन् । 

दोस्रो टेस्ट म्याच दिनरात खेलिनेछ र पिंक बलको उपयोग गरिएको छ । म्याचको आठौं ओभरमा इंग्ल्यान्डका बलर स्टुआर्ट ब्रोडले तेस्रो बलमा राउन्ड द विकेट बलिङ गरे । बल अनसाइडतिर गइरहेको थियो । 

बलमा ह्यारिसले ठूलो शट लगाउन खोजेका थिए तर त्यो ब्याटको छेउमा लागेर दाहिनेतर्फ गयो । बल लेग स्लिप र विकेटकीपरबीचबाट जाँदै गर्दा बटलरले हावामा उडेर क्याच समातेका हुन् । उनले एक हातले पञ्जामा बल पार्न सफलता पाएका हुन् । 

ह्यारिस जम्मा तीन रन बनाएर आउट भए । 

समाचार तयार पार्दासम्म अस्ट्रेलियाले ५१ ओभरमा एक विकेटको क्षतिमा १२२ रन बनाएको छ । डेभिड वार्नर र मार्नस लाबुसाग्नेबीच ११८ रनको साझेदारी भएको छ ।

INSANE! Buttler pulls in an all-timer behind the stumps! #Ashes pic.twitter.com/v96UgK42ce

— cricket.com.au (@cricketcomau) December 16, 2021