०१ असार २०८३, सोमबार
नेपालकै लोकप्रिय एपमध्येको एक हाम्रो नेपाली किबोर्डको गुगल प्ले स्टोरमा एक करोड डाउनलोड भएको छ । २०१४ देखि शुरू भएको हाम्रो नेपाली किबोर्ड एक करोड डाउनलोड भएको हाम्रो पात्रोले जनाएको हो ।
'फेसबुक र स्मार्ट फोन आउने क्रममा नेपाली लेख्न नमिल्ने अवस्था थियो र धेरैले रोमन नेपालीमै लेख्नुपर्ने थियो तर लेख्न सजिलो भने थिएन,' हाम्रो पात्रोले भनेको छ,' त्यही असहजतालाई मध्यनजर गर्दै २०१४ मा हाम्रो पात्रो नेपाली किबोर्ड आयो र धेरैको लागि नेपालीमा टाइप गर्न प्रयोग गर्न सजिलो भयो । नेपाली भाषीको लागि यो अत्यन्त महत्त्वपूर्ण कुरा थियो, त्यहि हाम्रो नेपाली किबोर्ड अहिले एक करोड डाउनलोड भएको छ ।'
रोमनबाट नेपाली तथा चलनचल्तीको देवनागरीमा किबोर्ड सुविधा रहेको हाम्रो ‘नेपाली किबोर्ड’ ले सबैभन्दा छोटो अवधिमै १० लाखको डाउनलोड पार गर्ने पहिलो नेपाली एप भएको थियो । योसँगै हाम्रो पात्रोका दुई एन्ड्रोइड एप करोडको संख्यामा डाउनलोड हुने सूचीमा परेका छन् । यसअघि हाम्रो पात्रो एपले यो सफलता पाइसकेको छ ।
एन्ड्रोइड फोनमा नेपालीमा टाइप गर्ने सजिलो तरिका नहुँदा प्रयोगकर्ताले हिन्दी किबोर्ड प्रयोग गर्नुपर्ने बाध्यता रहेको थाहा पाएपछि नेपाली किबोर्ड एप विकास गरिएको हाम्रो पात्रोका संस्थापक शंकर उप्रेतीले बताए ।
यसमा बोलेर टाइप गर्ने सुविधा, मोबाइल अनुसार किबोर्डको आकार चाहे जस्तो सानो या ठूलो बनाउन सक्ने सुविधाका साथ स्टिकर्स र चाहे अनुसार थिम परिवर्तन गर्ने सुविधा पनि रहेको छ ।
‘आज यो एप हाम्रो आफ्नै भाषामा टाइप गर्न एक करोड बढी नेपालीले डाउनलोड गरेका छन् । यो हाम्रो टोलीका सदस्यहरूको कडा परिश्रम र प्रयोगकर्ताहरूको विश्वास र समर्थनका कारण सम्भव भएको हो,’ उप्रेतीले भने ।
हाम्रो नेपाली किबोर्ड यहाँ क्लिक गरेर राख्न सकिन्छ ।
