नेकपा एमालेका अध्यक्ष केपी ओलीले बेसहारा र अभिभावकविहीनको अभिभावक एमाले भएको बताएका छन् । 

कपिलवस्तुको बहादुरगंजमा मंगलवार आयोजित जनसभालाई सम्बोधन गर्दै अध्यक्ष ओलीले एमालेले बेसहाराका लागि सामाजिक सुरक्षा भत्तालाई प्रोत्साहन गरेको बताएका हुन् । 

ओलीले भने, ‘म ७० वर्षको भएँ । १८ घन्टा काम गर्छु । तपाईँहरू पनि काम गर्नुस् अनि मात्र पार्टी अघि बढ्छ ।’ 

पूर्वप्रधानमन्त्री ओलीले नेपालको जमिन बाँझो राखेर भारतलाई पानी दिन नसकिने बताए । उनले कपिलवस्तुमा कृषि सिँचाइको लागि अब नौमुरे योजना छिटै शुरू हुने बताए । 

अध्यक्ष ओलीले आफ्नो कार्यकालमा भारतसँग सुमधुर सम्बन्ध स्थापित गरेको दाबी गरे । 

आफू प्रधानमन्त्री हुँदा कपिलवस्तुको तौलिहवाजस्तो शहरलाई ५० लाख रकम विनियोजन तथा सडक पूर्वाधारको लागि रकम विनियोजन गरेको बताए । 

एमालेका महासचिव शंकर पोखरेलले एमाले चुनावमा जान नडराउने बताए । 

यस्तै कार्यक्रममा जनता समाजवादी पार्टी नेपालका केन्द्रीय सदस्य मंगलप्रसाद गुप्तालगायत एमालेमा प्रवेश गरेका छन् । 

कार्यक्रममा विभिन्न पार्टी परित्याग गरी ६ हजार भन्दा बढी कार्यकर्ता एमालेमा प्रवेश गरेको नेकपा एमाले कपिलवस्तुका अध्यक्ष झविलाल पोखरेलले दाबी गरे ।