१० असार २०८३, बुधबार
अफ्रिकी मुलुक माडागास्करका एक मन्त्री समुद्रमा १२ घन्टा पौडी खेलेर सुरक्षित स्थानमा पुगेका छन् । उनी चढेको हेलिकप्टर दुर्घटनामा परेर समुद्रमा खसेपछि उनी लामो समय पौडिन बाध्य भएका हुन् ।
प्रहरी मामिलासम्बन्धी मन्त्री सर्ज गेले देशको उत्तरपूर्वी तटमा जहाज डुबेपछि फसेका मानिसको उद्धारमा सहभागी थिए ।
उक्त जहाज दुर्घटनामा ६४ जनाको मृत्यु भएको छ । त्यस मालवाहक जहाजमा १३० जना यात्रुहरू अवैध तरिकाले चढेका थिए । हिन्द महासागरमा सोमवार उक्त जहाज डुबेको थियो ।
पछि अधिकारीहरूले थप २५ वटा मृत शरीर सेन्टे मारी टापुसमूहमा भेटेका थिए ।
कुल ४५ यात्रुको उद्धार गरिएको छ भने २० जना अझै हराइरहेका छन् । उनीहरूको खोजी जारी छ ।
उद्धार गरिरहेको हेलिकप्टर समुद्रमा खसेपछि गेलेले साँझ साढे ७ देखि भोलिपल्ट बिहान साढे ७ सम्म समुद्रमा पौडी खेलेको बताए । उनी तटीय शहर महाम्बो पुगेका थिए ।
आफूलाई निकै चिसो अनुभव भए पनि मर्ने समय नआएकाले तटसम्म आइपुगेको उनले बताए ।
