नेपाल बार एशोसिएशनले न्यायालयको विकृति, विसंगति र प्रधानन्यायाधीश चोलेन्द्र शमशेर जबराविरुद्ध गर्दै आएको आन्दोलन कोरोना भाइरस संक्रमणको जोखिमका कारण भर्चुअलरूपमा गर्ने भएको छ ।

बारका महासचिव लीलामणि पौडेलले बुधवार जारी गरेको प्रेस विज्ञप्तिमा कोरोना भाइरसको बढ्दो संक्रमणका कारण आन्दोलनको स्वरूप परिवर्तन गरिएको जनाइएको छ ।

विज्ञप्तिमा माघ ६ गतेदेखि माघ १८ गतेसम्मका लागि आन्दोलनको भर्चुअल माध्यमबाट निरन्तरता दिने उल्लेख छ ।

बारले कोरोना संक्रमणबाट आम कानून व्यवसायी, सेवाग्राही, अदालतका न्यायाधीश, कर्मचारीलाई बच्न र बचाउनका लागि आन्दोलन, धर्नाका कार्यक्रमलाई हाललाई आन्दोलनको स्वरूप परिवर्तन गरी भर्चुअलरूपमा गर्न लागेको जनाएको छ ।