मोरङको विराटनगरसँग जोडिएको दशगजा क्षेत्रमा भारतीय सीमा सुरक्षा बल (एसएसबी) ले सुरक्षा पोष्ट बनाउँदा पनि सरकार भने मौन बनेको छ । विराटनगर वडा नं १६ को दरैयास्थित दशगजामा भारतीय सीमा सुरक्षा बलले आफूखुशी सुरक्षा पोष्ट बनाएको हो । उक्त सुरक्षा पोष्टमा २४ घण्टा नै हतियारसहितका भारतीय सुरक्षाकर्मी बस्ने गरेको स्थानीयवासिन्दाले बताएका छन् । त्यहाँ बसेका एसएसबीले नेपालीलाई दुःख समेत दिने गरेका छन् ।

दुई देशीय सीमानामा कुनै पनि संरचना बनाउन र गतिविधि गर्न नपाइने अन्तर्राष्ट्रिय कानून भएपनि त्यसलाई लत्याउँदै एसएसबीले सुरक्षा पोष्ट बनाएको हो । दशगजाको दुवैतर्फ ९.१ मिटर खाली राख्नुपर्ने प्रावधान भएपनि भारतीय पक्षले पटक–पटक दशगजा मिचेर सडक निर्माण र सुरक्षा पोष्ट राखेको छ ।

मोरङका प्रमुख जिल्ला अधिकारी काशिराज दाहालले सशस्त्र प्रहरीसँग समन्वय गरेर हटाउन निर्देशन दिइएको बताए । तर, एसएसबीले भने दशगजा क्षेत्र नभएको दावी गरेको छ ।  
हटाउनका लागि दुई देशका सुरक्षा अधिकारीबीच छलफल भएपनि उनीहरुले दशगजा क्षेत्र नभएको दावी गरेको सशस्त्र प्रहरी बल ३ नम्बर गण टंकी विराटनगरका एसपी राजकुमार लामिछानेले बताए । दुवै देशका सुरक्षा अधिकारीबीच छलफल गरेर हटाउन पहल भने भइरहेको उनको भनाइ छ ।