उनले संविधान निर्माण गर्ने मुख्य दलहरूबीच दूरी बढेको र समाजमा द्वन्द्व सिर्जना भएको बताएका छन् । ओलीले नेकपा (एमाले) लगायत संविधान निर्माणमा मुख्य भूमिका निर्वाह गरेका दललाई निषेध गर्दै अगाडि सारिएको संशोधन विधेयकले राजनीतिक धु्रवीकरण सिर्जना गरेको बताएका छन् ।


‘२०७४ माघ ७ गतेभित्र तीनै तहको निर्वाचन सम्पन्न गर्न सम्पूर्ण प्रयाश केन्द्रित गर्नुपर्ने बेला सुरु भएको असान्दर्भिक संशोधन प्रयाशले निर्वाचनलाई अनिश्चित बनाएको छ ।’ आज एक अपिल जारी गर्दै एमाले अध्यक्ष ओलीले भनेका छन्,‘ मिलेर बसेको नेपाली समाजमा विभिन्न नाममा विद्वेष ल्याउने र किस्ता–किस्तामा तराई र पहाड–हिमाललाई विभाजित गरेर तथाकथित ‘दुई राष्ट्रियता’ को मान्यता स्थापित गर्ने दुराशय लुकेको छ ।’

एमाले अध्यक्ष ओलीले ९० प्रतिशत सांसादहरुको सहमतिलाई सरकारले भत्काउन खोजेको आरोप लगाए । ‘मुलुकलाई सहज अवस्थामा फर्काउनुको साटो सरकार धम्कीको भाषा बोल्दै वातावरणलाई निरन्तर उत्तेजित र थप जटिल बनाउन उद्यत् देखिएको छ । ’ अपिलमा भनिएको छ ।

पुस २२ गते काठमाडौंमा ८ दलको सहभागितामा जनप्रदर्शनको तयारी गरेको एमालेले उक्त सभामा सहभागिताको लागि अपिल जारी गर्दैे संकट समाधानको लागि संशोधन विधेयक फिर्ता लिनु र मुलुकलाई निर्वाचनको दिशामा अगाडि बढाउनुपर्ने बताए ।

निर्वाचनलाई अन्यौल र अनिश्चयमा धकेलेर संविधान संशोधनका नाममा गरिने कुनै पनि जनविरोधी र देशघाती काम किमार्थ स्वीकार्य नहुने ओलीले बताएका छन् ।