उम्मेदवारलाई जिताउन चुनाव प्रचारमा गएका यी नेतालाई मतदाताले जुत्ता देखाएपछि ...

चुनाव प्रचारका क्रममा नेता–कार्यकर्ता र मतदातामा उत्साह हुन्छ तर उत्साह सँगसँगै असन्तुष्टि समेत देखिन्छ ।

भारतको उत्तर प्रदेशमा उतिबेला विधानसभाको चुनाव धुमधामसँग भइरहेको छ ।

उत्तर प्रदेशको नोएडामा रक्षामन्त्री राजनाथ सिंहका छोरा भारतीय जनता पार्टी (भाजपा) उम्मेदवार पंकज सिंहको प्रचारमा गएका नेता मनोज तिवारीलाई मतदाताले जुत्ता देखाएका छन् ।

नोएडाको सेक्टर–१७ मा भइरहेको चुनाव प्रचारका क्रममा स्थानीयले नेता तिवारीलाई जुत्ता देखाएका भारतीय सञ्चारमाध्यमले जनाएका छन् ।

कतिपय मतदाताले भाजपाको प्रतिस्पर्धी पार्टी समाजवादी पार्टी (सपा) प्रमुख अखिलेश यादवको पक्षमा नाराबाजी गर्दै भाजपाको विरोध गरेका छन् ।

नेता मनोज तिवारीको प्रचारमा स्थानीयले विरोध गरेको भिडियो भाइरल भइरहेको छ । तिवारी भारतको केन्द्रीय राजधानी नयाँदिल्लीका भाजपा नेता हुन् ।

विधानसभा चुनाव प्रचारका क्रममा कोरोना महामारीको सुरक्षा मापदण्डको समेत उल्लंघन गरिएको छ । नोएडामा पूर्वाञ्चल र विहारबाट बसाइ सरेर आएकाहरूको बसोबास छ ।

नेता तिवारी आउने प्रचारपछि कार्यक्रममा धेरै भीड देखिएको समाचारमा उल्लेख छ । भीडभाड हुँदा कोरोना मापदण्डको उल्लंघन भएको हो ।