१० असार २०८३, बुधबार
कोरोना भाइरस विरुद्धको पूर्ण डोज खोप लगाउने दर बढेसँगै मधेश प्रदेशमा विगत केही दिनदेखि कोरोना ग्राफ ओरालो लाग्दै गएको छ ।
माघको दोस्रो हप्तासम्म दैनिक २०० जनाको हाराहारीमा संक्रमित थपिँदै गएकामा विगत केही दिनदेखि त्यो संख्या ५० हाराहारीमा झरेको मधेश प्रदेश स्वास्थ्य निर्देशनालयले जनाएको छ ।
पछिल्लो समय मधेशमा संक्रमितको संख्याभन्दा निको भई घर फर्किनेको संख्या बढ्दै गएको छ । निर्देशनालयका अनुसार पछिल्ला २ दिनका अवधिमा प्रदेशभरि ९७ नयाँ संक्रमित थपिँदा १३२ निको भएर घर फर्किएका छन् ।
बुधवार प्रदेशका विभिन्न जिल्लामा ४३ नयाँ संक्रमित थपिँदा ४४ र मंगलवार ५४ जनामा संक्रमण पुष्टि हुँदा ८८ जना निको भएर घर फर्किएको प्रदेश स्वास्थ्य निर्देशक विजयकुमार झाले जानकारी दिए । उनका अनुसार बुधवार धनुषा र सर्लाहीमा १५–१५, महोत्तरी र सप्तरीमा ४–४, रौतहट र बारामा २–२ नयाँ संक्रमित थपिएका छन् भने मंगलवार धनुषामा १६, सिरहामा १४, महोत्तरी र पर्सामा ६–६, सप्तरीमा ५, बारा र रौतहटमा २–२ तथा सर्लाहीमा १ नयाँ संक्रमित थपिएका छन् ।
थपिएका संक्रमितको स्वास्थ्य अवस्था सामान्य रहेको र सबै होम आइसोलेसनमा रहेका जनाइएको छ ।
महामारी शुरू भएपछि हालसम्म प्रदेशमा संक्रमणबाट हालसम्म ४१ हजार १२२ संक्रमित हुँदा उपचारपश्चात ३८ हजार २६३ ‘डिस्चार्ज’ भएका छन् भने १ हजार ५५ जनाको मृत्यु भएको निर्देशनालयको तथ्यांकले देखाएको छ ।
निर्देशनालयका अनुसार संक्रमणका कारण हालसम्म बारामा १८१, सप्तरीमा १६१, सिरहामा १३५, धनुषामा १३२, पर्सामा १३२, रौतहटमा १२९, सर्लाहीमा ९३ र महोत्तरीमा ९१ जनाको मृत्यु भइसकेको छ ।
शुरूमा संक्रमण तीव्रगतिमा फैलिए पनि खोप लगाउने दर बढेसँगै संक्रमणदर घट्दै गएको चिकित्सकहरूले बताएका छन् । वर्तमान सरकारले सार्वजनिक सेवाका लागि अनिवार्य खोप कार्ड लागू गरेपछि करीब ३ हप्ताको अवधिमा प्रदेशका जिल्लामा कोरोना विरुद्धको खोप लगाउने दर करीब १७ प्रतिशतले बढेको प्रदेश स्वास्थ्य निर्देशनालयले जनाएको छ । – राजु विश्वकर्मा/रासस
