२९ जेठ २०८३, शुक्रबार
सुत्केरी सुविधाका लागि टाढा धाउन नपरोस् भनेर सरकारले गाउँमै निःशुल्क बर्थिङ सेन्टर सञ्चालन गरेको छ तर गाउँका महिला अझै पनि पैसा खर्च गरेर शहर पुगी सुत्केरी गराउँछन् ।
आदिवासी, मधेशी र मुस्लिम समुदायको बाहुल्य रहेको झापा गाउँपालिकाको २ वर्षको तथ्यांक विश्लेषण गर्दा स्थानीय महिला पालिकमै रहेको बर्थिङ सेन्टरमा गर्भवती जाँच गर्न आए पनि बच्चा जन्माउन भने दमक र बिर्तामोडका ठूला अस्पताल नै धाउने गरेको तथ्यांकले देखाएको छ ।
पालिकाको कामाटोली बजारमा विगत ५ वर्षदेखि सुविधासम्पन्न बर्थिङ सेन्टर सञ्चालनमा छ तर विगत २ वर्षको अवधिमा पालिकामा ३ हजार ११७ बालबालिकाको जन्म भए तापनि सो बर्थिङ सेन्टरमा भने ४४ को मात्र जन्म भएको स्वास्थ्य केन्द्रका प्रमुख लक्ष्मण विकले बताए ।
पालिकाले स्वास्थ्य चौकीमै बर्थिङ सेन्टर सञ्चालन गरेको हो । जहाँ सुत्केरी गराउने जनशक्ति र उपकरण पर्याप्त छ । सहर धाउन नसक्ने अतिविपन्न समुदायका नगन्य महिलाले मात्र सुत्केरी सेवा लिएको पालिकाको तथ्यांकले देखाएको छ ।
उनका अनुसार सेन्टरमा आर्थिक वर्ष २०७७/०७८ मा ११ र २०७६/०७७ मा २३ जना सुत्केरी भएका छन् । सुत्केरी हुने अधिकांश मुस्लिम समुदायका महिला रहेको उनले बताए । उनले गर्भवती हुने महिला पहिलोपटक जाँच गराउन धेरै आउने तर दोस्रो पटकदेखि घट्दै जाने गरेको बताए ।
