२५ जेठ २०८३, सोमबार
गरीबी निवारणका लागि नवलपुरको एक सामुदायिक वनले आफ्ना उपभोक्तालाई सीपमूलक तालिम सञ्चालन गरेको छ ।
नवलपरासी (बर्दघाट–सुस्तापूर्व)को गैंडाकोट–१ मा रहेको मौलाकाली सामुदायिक वनले स्थानीय महिलालाई सीप सिकाउन शुरू गरेको हो ।
वनले महिला सशक्तीकरण कार्यक्रमअन्तर्गत शुक्रवारदेखि १७ महिलालाई हस्तकलासम्बन्धी तालिम दिन शुरू गरेको हो । ७ दिने तालिम शुक्रवार गैंडाकोट नगरपालिका प्रमुख छत्रराज पौडेलले शुभारम्भ गर्दै उद्यमशील र स्वरोजगार बन्न आग्रह गरे ।
गैंडाकोटमा केबलकार निर्माण भएपछि आन्तरिक पर्यटक बढ्ने र हस्तकलाको बजार पनि बढ्ने भएकाले हस्तकलाका सामग्री बिक्री गरेर मनग्य आम्दानी गर्न सकिने उनको भनाइ थियोे ।
सामुदायिक वनका अध्यक्ष हरिप्रसाद सापकोटाले विगतका कार्यक्रमबाट महिलाहरू स्वरोजगारका साथै स्वावलम्बी पनि भएकाले सीपमूलक कार्यक्रमलाई निरन्तरता दिइने बताए ।
महिला सशक्तीकरण समिति संयोजक इन्दिरा शर्माले तालिम लिएका सहभागीले उत्पादन गरेका सामग्रीलाई बजारीकरणका लागि समेत सामुदायिक वनले संयोजन गर्ने जानकारी दिइन् । सबडिभिजन वन कार्यालयका प्रमुख सूर्यसिंह गुरुङले वन विकास कार्यक्रममा रहेको बजेटबाट महिला सशक्तीकरणको कार्यक्रम अघि बढाइनुपर्नेमा जोड जोड दिए ।
सहभागी प्रतिक्षार्थीले अवसरलाई उद्यमशीलतामा परिणत गर्न सुझाव दिएका थिए ।
