सिन्धुपाल्चोकको चौतारा साँगाचाेकगढी नगरपालिकामा नेकपा माओवादी केन्द्रका कार्यकर्ताबीच झडप भएको छ । 

टिकट पाउने र नपाउने पक्षबीच झडप हुँदा साँगाचोकगढी निर्वाचन कार्यालयमा तनावग्रस्त स्थिति उत्पन्न भएको छ । झडपकाे क्रममा नगरपालिका ताेडफाेड समेत भएकाे छ ।

चौतारा साँगाचाेकगढीकाे वडा नम्बर १ र १४ काे वडा अध्यक्ष एकीकृत समाजवादीलाई दिएपछि टिकट नपाउने माओवादी केन्द्रका कार्यकर्ताले नगरपालिका ताेडफाेड गरेका हुन् । 

झडपका कारण मनोनयन दर्ता प्रक्रिया समेत केहीबेर अवरुद्ध भएको सिन्धुपाल्चाेकका प्रहरी उपरिक्षक रामेश्वरप्रसाद यादवले जानकारी दिए । स्थिति नियन्त्रणमा लिन प्रहरीले अश्रुग्यास पनि प्रहार गरेको थियाे । 

अहिले भने अवस्था नियन्त्रणमा आएकाे र उम्मेदवारी मनाेनयन धमाधम भइरहेकाे यादवले बताए ।

चौतारा साँगाचोकगढी–११ र १४ को वडाध्यक्ष नेकपा (एस)लाई दिएपछि माओवादी कार्यकर्ताहरूले आक्रोशित हुँदै निर्वाचन कार्यालय तोडफोड गरेका थिए । जसकारण कार्यालयका सीसाहरू पनि फुटेका छन् । ३० मत पनि नभएको नेकपा (एस)लाई वडाध्यक्ष दिएको भन्दै माओवादी कार्यकर्ताहरू आक्रोशित भएका थिए ।

चौतारा साँगाचाेकगढीका प्रमुख अमानसिंह तामाङलाई टिकट नदिएपछि उनले स्वतन्त्र उम्मेदवारी दर्ता गराएका छन् ।

यसअघि उनी माओवादी केन्द्र छाडेर एमालेबाट मेयरको उम्मेदवार हुन खोजेका थिए । तर, माओवादी केन्द्रका नेताहरुले तामाङलाई मेयरको टिकट दिने आश्वासन दिएर एमाले प्रवेशबाट रोकेका थिए । 
तर, अन्तिममा माओवादी केन्द्रले तामाङलाई टिकट नदिएर कृष्णप्रसाद सापकोटालाई टिकट दिएको छ । 

सापकोटा प्रतिनिधि सभाका सभामुख अग्नीप्रसाद सापकोटाका भाइ पर्ने व्यक्ति हुन् ।