सशस्त्र प्रहरी महानिरीक्षक राजु अर्यालले सशस्त्र प्रहरी बल नेपाल प्रधान कार्यालयबाट वैशाख २६ गते निर्वाचन सुरक्षार्थ देशभर खटिएका सकल दर्जाका राष्ट्रसेवक सशस्त्र प्रहरी कर्मचारीलाई आसन्न स्थानीय तह निर्वाचनलाई शान्तिपूर्ण र भयरहित वातावरणमा पूरा गराउन प्रतिबद्ध भएर लाग्न निर्देशन दिएका छन् ।

उनले निर्वाचन सुरक्षामा खटिएका राष्ट्रसेवकले कार्यक्षेत्रमा देखाएको उत्साहपूर्ण परिचालनको प्रशंसा गर्दै निर्वाचनमा खटिएका सशस्त्र प्रहरी कर्मचारीको बन्दोवस्ती एवं राशन व्यवस्थापन, स्वास्थ्य, अनुशासन, पेशागत दक्षता प्रदर्शन, सीमा सुरक्षामा परिचालन, चोरीतस्करी नियन्त्रण लगायतका जिम्मेवारीका क्षेत्रमा परिचालित भई सम्पादन गरेका कार्यको सूक्ष्म रूपमा अनुगमन गर्ने गरी प्रधान कार्यालयबाट अनुगमन टोली समेत परिचालन गरिएको बताए ।

महानिरीक्षक अर्यालले निर्वाचन सुरक्षा प्रयोजनका लागि उपलब्ध स्रोतसाधनको अधिकतम उपयोग गरी नेपाल सरकारबाट प्राप्त नीति निर्देशनलाई पालना गर्दै विभिन्न निकायसँग समन्वय र सहकार्य गरी आर्थिक अनुशासनमा रहेर मानवअधिकारको सम्मान गर्दै जिम्मेवारी निर्वाहमा क्रियाशील रहन निर्देशन दिए ।

लैंगिक हिंसा र गैरव्यावसायिक कार्यमा संलग्न रहने सशस्त्र प्रहरी कर्मचारीलाई कारबाही गरिने समेत उनले बताए ।

उनले निर्वाचन क्षेत्रमा खटिएका सशस्त्र प्रहरी कर्मचारीलाई निर्वाचन सुरक्षा, आचारण संहिता र पदयी आचरणमा रही अनुशासन, इमान्दारिता र लगनशील भई कार्यक्षेत्रमा परिचालन हुन निर्देशन दिँदै सुरक्षा क्षेत्रमा परिचालन हुँदा सशस्त्र प्रहरी कर्मचारीले आफूले गरेका गतिविधिलाई सामाजिक सञ्जालमा शेयर तथा पोस्ट गर्न नहुने कुरा समेत बताए ।

कमाण्डर तहका अधिकृतले विभिन्न सुरक्षा निकायका प्रमुखसँग समन्वय र सहकार्य गरी सबै निर्वाचन क्षेत्रहरूमा सुरक्षाको भरपर्दो व्यवस्था मिलाउन निर्देशन दिँदै सशस्त्र प्रहरी महानिरीक्षक अर्यालले भने, ‘जस्तोसुकै चुनौतीभित्र अवसर पनि अवश्य लुकेको हुन्छ, सामना गर्न सक्नुपर्छ ।’

कार्यक्रम लाइभ भिडियो स्ट्रिमिङ तथा सशस्त्र प्रहरी बल नेपालको सञ्चारमार्फत सम्पूर्ण इकाईमा हेर्ने र सुन्ने व्यवस्था मिलाइएको थियो । 

आसन्न स्थानीय तह निर्वाचन २०७९ लाई भयरहित वातावरणमा शान्तिपूर्वक सम्पन्न गराउन देशभर परिचालित भएका सशस्त्र प्रहरीहरुको स्थलगत अनुगमन तथा निरीक्षण गरी व्यावसायिक र चुस्तदुरुस्त रूपमा जिम्मेवारी निर्वाहमा क्रियाशील गराउन सशस्त्र प्रहरी बल नेपाल प्रधान कार्यालयले सशस्त्र प्रहरी वरिष्ठ उपरीक्षक र सशस्त्र प्रहरी उपरीक्षकको नेतृत्वमा वैशाख २५ गते सबै प्रदेशमा १/१ टोली परिचालन गरेको छ । 

कायममुकायम सशस्त्र प्रहरी वरिष्ठ उपरीक्षकहरू कमलप्रसाद तिउसिना गण्डकी प्रदेश, किरण बस्नेत १ नम्बर प्रदेश, उद्धवबहादुर न्यौपाने मधेश प्रदेश, राजेन्द्र खड्का सुदूपश्चिम प्रदेश, युवराज अर्याल लुम्बिनी प्रदेश, सशस्त्र प्रहरी उपरीक्षकहरू टोपबहादुर खनाल बाग्मती प्रदेश र अच्युतकुमार मजगैयाँ कर्णाली प्रदेशमा विशेष जिम्मेवारीका साथ निर्वाचन लक्षित सुरक्षाका लागि खटिएका छन् । 

सो टोली प्रदेशस्थित सम्बन्धित विभिन्न कार्यालय तथा व्यक्तिसँग समन्वय राखी निर्वाचनमा परिचालित सशस्त्र प्रहरी जनशक्तिलाई उच्च मनोबलका साथ कार्यक्षेत्रमा खटाई आवश्यक निर्देशन दिनुको साथै कार्यक्षेत्रमा भैपरी आउने समस्या तथा चुनौतीलाई पन्छाउँदै शान्तिपूर्वक निर्वाचन सम्पन्न गरी फिर्ता हुनेछन् ।