तत्कालीन नेपाल कम्युनिष्ट पार्टी (नेकपा)को सचिवालय सदस्यहरूको बैठक बस्ने गरी नेताहरूले तयारी गरिरहेका छन् । 

माओवादी केन्द्र र एमाले एकीकृत भएर बनेको नेकपामा ९ सदस्यीय सचिवालय थियो । उक्त सचिवालयको बहुमत सदस्य पुनः वामपन्थी एकता प्रयासमा छलफलका लागि जुट्न लागेका हुन् ।

माओवादी केन्द्रको केन्द्रीय कमिटीको बैठकमा अध्यक्ष पुष्पकमल दाहाल प्रचण्डले वामपन्थी एकताको ध्रुवीकरण प्रयासका लागि तत्कालीन नेकपाको बहुमत सदस्यको बैठक बस्नेबारे छलफल भइरहेको जानकारी गराएका थिए । 

माओवादी केन्द्रको केन्द्रीय सदस्य हेमराज भण्डारीले भने, ‘तत्कालीन नेकपाको बहुमत सचिवालय सदस्यहरूको बैठक बसेर वापमन्थी ध्रुवीकरणबारे छलफलको तयारी भएको जानकारी अध्यक्षले बैठकमा गराउनुभएको थियो । आजभोलिमै बैठक बस्ने तयारी भएको उहाँले बताउनु भएको थियो ।’

प्रचण्डले माओवादी केन्द्रको बैठकमा बताएअनुसार, आज वा भोलि नै नेकपाको सचिवालयमा रहेका ९ मध्ये ५ जना नेताहरूको बैठक बस्ने सम्भावना रहेको छ । 

प्रचण्डले माओवादी घटकहरू एकीकृत हुने अवस्था बनेको बताउने क्रममा तत्कालीन नेकपाको सचिवालयका बहुमत सदस्यको बैठकबारे पनि जानकारी गराएका थिए । 

तत्कालीन नेकपा रहेका सचिवालय सदस्यमध्ये अहिले ४ जना एमालेमा छन् भने ५ जना एमालेभन्दा बाहिर छन् । 

एमाले अध्यक्ष केपी शर्मा ओली, वरिष्ठ उपाध्यक्ष ईश्वर पोखरेल, उपाध्यक्ष रामबहादुर थापा र विष्णु पौडेल नेकपाको सचिवालय सदस्य थिए । 

त्यसबाहेक माओवादी केन्द्रका अध्यक्ष प्रचण्ड, नेता नारायणकाजी श्रेष्ठ, एकीकृत समाजवादीका अध्यक्ष माधव नेपाल, नेता झलनाथ खनाल र नेकपा एकता राष्ट्रिय अभियानका संयोजक वामदेव गौतम नेकपाको सचिवालय सदस्य थिए । 

तत्कालीन नेकपाको सचिवालयमा अहिले एमालेभन्दा बाहिर रहेका नेताहरूको बहुमत थियो । तिनै बहुमत नेताहरूको बैठक बसेर वामपन्थी ध्रुवीकरणको प्रयासबारे छलफल गर्न लागेका हुन् ।

माओवादी केन्द्रका अध्यक्ष प्रचण्डले वामपन्थी दलहरूलाई मिलाएर समाजवादी मोर्चा बनाउने बताउँदै आएका छन् ।