२३ जेठ २०८३, शनिबार
भारतका संविधान निर्माता भीमराव अम्बेडकरलाई दक्षिणपन्थी नेता सुब्रह्मण्यम स्वामीले ब्राह्मण भनेपछि दलित तथा जनजाति वर्गका मानिसले विरोध गरेका छन् ।
द प्रिन्ट अनलाइन पत्रिकामा छापिएको के कल्याणीको एक लेखलाई सन्दर्भ बनाउँदै विवादास्पद छविका स्वामीले अम्बेडकर ब्राह्मण भएको ठोकुवा गरेका हुन् । तर त्यस लेखमा अम्बेडकरलाई नायर भनिने दक्षिण भारतका कथित उच्च जातिको वस्त्र मुन्डु लगाउन दिइएको विषयमा आलोचना भएको चर्चा छ ।
त्यसको गुदी कुरामा नपसेर स्वामीले अम्बेडकरको सवर्ण मुन्डु वस्त्रसहितको तस्वीर हेरेको भरमा उनी ब्राह्मण भएको बताए । ज्ञानी, त्यागी र साहसी व्यक्ति ब्राह्मण हुने बताउँदै बाबासाहेब अम्बेडकर पनि ब्राह्मण भएको उनले ट्वीट गरे ।
उनको यस ट्वीटमा आपत्ति जनाउँदै दलित अभियन्ताहरूले उनलाई माफी माग्न भनेका छन् । ट्विटरमा ह्याशट्याग माफी मागो स्वामी ट्रेन्डिङमा छ ।
अम्बेडकरले आफूलाई दलितका रूपमा चिनाउने गर्थे र हिन्दू धर्म परित्याग गरी बौद्ध धर्म अपनाएका थिए । भारतका दलित अभियन्ताहरू उनलाई आफ्नो आदर्श पात्र मान्छन् ।
दलित चिन्तक दिलीप मण्डलले ट्वीट गरी बाबा साहबलाई ब्राह्मण भनी उहाँको वैचारिक विरासत र तमाम रचनलाई स्वामीले अपमान गरेको आरोप लगाए । स्वामीलाई छोड्न नहुने उनको भनाइ छ ।
समर्थन कीजिए : सुब्रह्मण्यम स्वामी ने बाबा साहब को ब्राह्मण कहकर बाबा साहब की पूरी वैचारिक विरासत, उनकी तमाम रचनाओं का अपमान किया है। स्वामी को छोड़ना नहीं है। वरना जैसे ये तथागत गौतम बुद्ध को विष्णु बता रहे हैं वैसे ही कल बाबा साहब को ब्राह्मण बना देंगे। #माफी_मांगो_स्वामी pic.twitter.com/Ej1XkO5F8k
— Dilip Mandal (@Profdilipmandal) August 28, 2022
