मकवानपुर उद्योग वाणिज्य संघका उपाध्यक्ष उज्वल चौलागाईंले निजी क्षेत्रले संघीयता प्रत्याभूत गर्न नसकेको बताएका छन् । सोमवार बागमती प्रदेशको राजधानी हेटौंडामा भएको संघीयता कार्यान्वयन अध्ययन तथा अनुगमन विशेष समितिको अन्तरक्रिया कार्यक्रममा बोल्दै चौलागाईंले यस्तो बताएका हुन् । 

उनले संघीयता आइसकेपछि पनि अझै लगानीमैत्री वातावरण बन्न नसकेको गुनासो गरे । चौलागाईंले उद्योग दर्ता र नवीकरणका लागि काठमाडौं जानुपर्ने बाध्यता अझै कायम रहेको उल्लेख गर्दै निजी क्षेत्रका लागि संघीयता आउन नसकेको बताए । 

‘निजी क्षेत्रले संघीयता प्रत्याभुत गर्न पाएका छैनौँ । आज पनि लगानीमैत्री वातावरण देशमा छैन । यो प्रदेश सरकार आएपछि औद्योगिक क्षेत्रमा क्रान्ति होला भनेको त्यो देखिएन । उद्योग दर्ता र नवीकरणका लागि काठमाडौं जानुपर्छ भनेपछि कहाँनेर आयो संघीयता ? हामीले अहिलेसम्म कतिवटा उद्योग चलाउन सक्यौँ र चलाउने वातावरण कति बनायौँ ? त्यसको मूल्यांकन हुनुपर्छ । उद्योग मन्त्रालयमा सबैभन्दा कम छ । नापतौल कार्यालय प्रदेशमा नआउँदा नापतौलका लागि ढक, तराजु बोकेर वीरगञ्ज कार्यालय धाउनुपर्छ ।’

त्यस्तै, व्यवसायी बद्रिनाथ शर्माले संघीयताले निजी क्षेत्रको मानमर्दन गर्ने काम गरेको आरोप लगाए । उनले तीन तहको सरकारले उद्योगी व्यवसायीहरूलाई औद्योगिक क्षेत्रमा जथाभावी भाडा बढाएर आतंकितसमेत बनाएको बताए ।  ‘निजी क्षेत्र नभई राष्ट्रिय अर्थतन्त्र चल्दैन । अहिले जसले उद्योग चलाउने इच्छा देखाउँछ उसले उद्योग स्थापना गर्न पाउँदैन । औधोगिक क्षेत्रमा जथाभावी व्यवसायीहरुलाई भाडा बढाउने काम गरिएको छ । यसरी निजी क्षेत्रलाई आतंकित बनाउने र मानमर्दन गर्ने काम गरेको छ’, उनले भने ।