२५ जेठ २०८३, सोमबार
दार्चुलाको लास्कु खोलाको धार फर्काउन उद्योग वाणिज्य तथा आपूर्तिमन्त्री दिलेन्द्रप्रसाद बडू आफै फिल्डमा खटिएका छन् । शुक्रवार आएको बाढी तथा पहिरोले पाँच जनाको ज्यान लिनुका साथै अझै केही बेपत्ता रहेका छन् ।
खोलाले धार परिवर्तन गर्दै बाढी बस्तीमा पसेपछि ठूलो जनधनको क्षति भएको थियो । खोलाको धार पुरानै ठाउँमा फर्काउनका लागि आइतवार बिहानै मन्त्री बडूसहित सुरक्षा निकाय र स्थानीयवासीले समेत श्रमदान गरेका छन् । सशस्त्र प्रहरी बल, नेपाली सेना, नेपाल प्रहरी, जनप्रतिनिधि र स्थानीयसँगै मन्त्री बडूले पनि बगरमा पुगेर ढुंगा बोकेका छन् । उनीहरूले खोलाको धार फर्काउन तटबन्धन गरेका छन् ।
शुक्रवार रातिको अविरल वर्षाका कारण महाकाली नगरपालिका र नौगाड गाउँपालिकाका विभिन्न स्थानमा पहिरोले ठूलो क्षति पु¥याएको छ । अहिलेसम्म ५ जनाको शव भेटिएको ७ जना बेपत्ता रहेको र ८ जना घाइते भएका छन् ।
बाढीले लास्कु क्षेत्रका ४, बांगाबगर क्षेत्रका ११ घर तथा दशरथनगर आधारभूत विद्यालय पूर्णरुपमा क्षति भएको छ । दुहुँ र महाकाली जोड्ने लास्कु खोला झोलुंगे पुल र मोटरपुल बगाएको छ । बाढीले पार्किङमा राखेका ५ बोलेरो जीप बगाएको छ, भने १ ट्याक्टर र १ अल्टो कार बगाएको प्रहरी जनाएको छ ।
