०७ असार २०८३, आइतबार
प्रधानमन्त्री शेरबहादुर देउवाले नेपाल भ्रमणमा रहेका चीनको जनकांग्रेसका स्थायी कमिटी अध्यक्ष ली चान्शुसँग नेपाली भूमिमा चीनविरूद्धका गतिविधि गर्न नदिने प्रतिवद्धता व्यक्त गरेका छन् ।
४ दिने भ्रमणका लागि नेपाल आएका ली र प्रधानमन्त्री देउवाबीच मंगलवार सिंहदरबारमा भेटवार्ता भएको हो । ली नेतृत्वको प्रतिनिधि मण्डलसँगको भेटवार्तामा प्रधानमन्त्री देउवाले नेपालको परराष्ट्र नीति पञ्चशीलको सिद्धान्तमा आधारित रहेको र नेपाल ‘एक चीन नीति’प्रति प्रतिबद्ध रहेको बताएका हुन् ।
लीको भ्रमणले नेपाल र चीनबीचको द्विपक्षीय सम्बन्ध थप प्रगाढ हुने देउवाले बताए ।
देउवासँगको भेटमा लीले नेपाल र चीन बीचमा ६ दशकभन्दा लामो समयदेखि असल छिमेकीकारूपमा मैत्रीपूर्ण सम्बन्ध स्थापित हुँदै आएको र आगामी दिनमा पनि यसले निरन्तरता पाउने विश्वास व्यक्त गरेका छन् ।
चीन नेपालको सार्वभौमसत्ता, भौगोलिक अखण्डता र राष्ट्रिय एकताका सन्दर्भमा गम्भीर र सचेत रहेको समेत लीले देउवासँग बताएका छन् ।
