चीनको सत्तारूढ दल चिनियाँ कम्युनिस्ट पार्टीको २०औं राष्ट्रिय महाधिवेश आइतवारबाट राजधानी बेइजिङमा शुरू भएको छ । 

महाधिवेशनलाई सम्बोधन गर्दै राष्ट्रपति सी चिनपिङले ताइवानका विषयमा टिप्पणी गरेका छन् । 

सीले आफूहरू शान्तिपूर्ण पुनरेकीकरणका लागि इमान्दारीका साथ लागिरहने बताए । त्यसका लागि अधिकतम प्रयास पनि गरिरहने उनको भनाइ छ । 

तर ताइवान पुनरेकीकरणका लागि बल प्रयोग गर्ने विकल्पलाई त्याग्ने प्रतिज्ञा आफूहरूले कदापि नगर्ने उनको धारणा छ । पुनरेकीकरणका लागि आवश्यक सबै उपाय अपनाउने पनि उनले बताए ।

राष्ट्रिय सुरक्षा चीनको पुनरुत्थानको मजबुत आधारशिला भएको बताए । बलियो र समृद्ध चीन बनाउनका लागि सामाजिक स्थिरता पूर्वशर्त भएको उनको भनाइ छ । 

चीनले कहिले पनि प्रभुत्व स्थापित गर्न नखोज्ने वा विस्तारवादमा संलग्न नहुने सीले बताए । सबै किसिमका प्रभुत्ववाद तथा शक्तिमा आधारित राजनीतिका विरुद्ध चीन दह्रो गरी उभिएको उनको दाबी छ । उनले चीन शीतयुद्ध मानसिकता, अन्य मुलुकको आन्तरिक मामिलामा हस्तक्षेप तथा दोहोरो मापदण्डका विरुद्ध उभिएको पनि बताए । 

राष्ट्रपति बनेपछि भ्रष्टाचारका विरुद्ध व्यापक अभियान चलाएका सीले आइतवारको सम्बोधनमा भ्रष्टाचार मौलाउने भूमि र अवस्थाहरू कायम रहुन्जेल आफूहरूले सचेत गराइरहनुपर्ने सीको भनाइ छ । भ्रष्टाचारविरुद्धको लडाइँमा आफूहरूले एक मिनेट पनि फुर्सद नलिने उनले बताए । 

विदेशी शक्ति तथा केही पृथक्तावादीहरूले ताइवानलाई स्वतन्त्र मुलुक बनाउन खोजेको भन्दै सीले तिनीहरूलाई आफूले तारो बनाउने बताए । तर समान चिनियाँ संस्कृति अपनाउने ताइवानका सर्वसाधारणलाई आफूहरूले कहिले पनि निशाना नबनाउने उनको भनाइ छ । 

चीन सरकारले आयको पुनर्वितरण प्रणालीलाई सुधार गर्ने अनि कामको प्रकृतिअनुसार विभिन्न किसिमका वितरणका उपाय अपनाइरहने पनि सीले बताए । आयको पुनर्वितरण तथा सम्पत्ति जोड्ने तरिकालाई नियममा राम्रोसँग बाँध्ने उनको भनाइ छ ।