०३ साउन २०८३, आइतबार
युक्रेनको विवादास्पद वेबसाइट मित्रोभोरेत्सले बुधवार कजाकस्तानका राष्ट्रपति कासिम–जोमार्ट तोकाएभको नाम आफ्नो कालोसूचीमा चढाएको छ ।
किएभका शत्रुहरूको सूची उक्त वेबसाइटमा राख्ने गरिन्छ र नाम भएकाहरूको भौतिक सफाया गरिएको विषयमा अप्डेट दिन्छ ।
युक्रेनविरुद्ध रुसको आक्रमणलाई सार्वजनिक रूपमा स्वीकार गर्न नमानेको अनि सन् २०१४ मा युक्रेनमाथि रुसको आक्रमणलाई पनि अस्वीकार गरेको भन्दै उनलाई कालोसूचीमा राखिएको हो ।
सन् २०१९ मा तोकाएभले जर्मन सञ्चारमाध्यम डोयचवललाई दिएको अन्तर्वार्तालाई उनको अपराधको प्रमाणका रूपमा प्रस्तुत गरिएको छ । त्यस अन्तर्वार्तामा उनले क्राइमिया रुसमा जोडिनुलाई जबर्जस्ती मिसाइएको भन्न नमिल्ने बताएका थिए ।
मिरोभोरेत्स भनेको युक्रेनी भाषामा शान्तिनिर्माता हो । सन् २०१४ मा शुरू गरिएको यो वेबसाइट युक्रेनको सुरक्षा सेवासँग जोडिएको मानिन्छ । युक्रेनको राष्ट्रिय सुरक्षामाथिको जोखिम औंल्याउने यसको उद्देश्य रहेको बताइन्छ । अज्ञात मोडरेटरहरूले चलाएको स्वतन्त्र डेटाबेसका रूपमा यसलाई लिइएको छ ।
युक्रेनका लागि जोखिम भनिएका व्यक्तिको नाम, जन्ममिति, स्थायी ठेगाना, तस्वीर र सामाजिक सञ्जालका पेजहरू वेबसाइटमा राखिएको छ । आफूले कानून कार्यान्वयन निकाय तथा विशेष सुरक्षासेवा प्रदायकहरूलाई रुसससमर्थक आतंकवादी, पृथक्तावादी तथा युद्धअपराधी समात्नका लागि सहयोग गरिरहेको वेबसाइटको दाबी छ ।
