नेपाली कांग्रेसका नेता शंशाक कोइराला चुनावी कार्यक्रममा सहभागी हुँदै गर्दा बेहोस भएका छन् । भरतपुरस्थित चितवन मेडिकल कलेजमा शशांकको उपचार भइरहेको उनका सहयोगी भरत तिवारीले जानकारी दिए ।

‘चुनावी भाषण गर्दै गर्दा उहाँ बेहोस हुनुभयो । चितवन मेडिकल कलेजमा उहाँको उपचार भइरहेको छ । अहिले अवस्था सामान्य छ’, तिवारीले भने । 

कोइराला नवलपुरको अमरापुरीमा सोमबार आयोजित चुनावी कार्यक्रममा सहभागी हुन पुगेका थिए । मंसिर ४ को चुनावका लागि कोइराला नवलपुर क्षेत्र नम्बर–१ मा सत्ता गठबन्धनका तर्फबाट प्रतिनिधि सभा सदस्य उम्मेदवार छन् ।

अस्पतालमा एमआरई र सीटी स्क्यान गरिएको तर, कुनै समस्या नदेखिएको तिवारीले बताए । ‘पहिले पनि उहाँलाई यस्तो भइरहन्थ्यो, २–३ पटक भइसकेको छ । अहिले चाहिँ ब्लड सर्कुलेशनमा सामान्य समस्या भएको जस्तो देखियो । केहीबेरमा डिश्चार्ज भएर जान्छौँ’, तिवारीले भने ।