निर्वाचन आयोगले राजनीतिक दलले कुनै सभा वा कार्यक्रममा बढीमा १० वटासम्म राष्ट्रिय झण्डा प्रयोग गर्नसक्ने आचारसंहिताको प्रावधान स्मरण गराएको छ । सोमवार विज्ञप्ति जारी गर्दै आयोगले उक्त संख्याभन्दा बढी राष्ट्रिय झण्डाको प्रयोग आचारसंहिताविपरीत हुने स्मरण गराएको हो । 

आयोगले कात्तिक १७ गतेदेखि मात्रै राजनीतिक दल तथा उम्मेदवारले निर्वाचन प्रचारको काम शुरु गर्नेपर्ने पनि उल्लेख गरेको छ । कात्तिक १७ देखि मंसिर १ गतेसम्म राजनीतिक दल तथा उम्मेदवारले सभा, जुलुस, विद्युतीय माध्यमबाट प्रचार प्रसारको काम गर्नसक्ने आयोगले जानकारी दिएको छ । 

आयोगका प्रवक्ता शालिग्राम शर्मा पौडेलले जारी गरेको विज्ञप्तिमा आचारसंहिता बमोजिम निर्वाचन प्रचार-प्रसारका लागि आमसभा, कोणसभा गर्दा मञ्चको तयारीको लागि लागेको खर्चको विवरण सम्बन्धित उम्मेदवारले आफै वा प्रतिनिधिमार्फत मतदान सम्पन्न भएको १५ दिनभित्र निर्वाचन कार्यालयमा पेश गर्न भनिएको छ । 

त्यस्तै, निर्वाचन प्रचारका क्रममा कुनै पनि धर्मको नाममा प्रचार–प्रसार गर्न गराउन नहुने, उम्मेदवार तथा निजको परिवारलाई कुनै तवरबाट डर, त्रास तथा धम्की दिन नहुने र कुनै साम्प्रदायिक विद्वेष फैलाउने गरी प्रचार–प्रसार गर्न वा मत माग्न नहुने आचारसंहिताको व्यवस्था पनि आयोगले स्मरण गराएको छ ।