तनहुँ जिल्लाको ऋषिङ गाउँपालिका–१ झापुटारमा निर्माणधीन १४० मेगावाट क्षमताको तनहुँ जलविद्युत् आयोजनाको सुरुङ खन्ने कार्य अघि बढाइएको छ । 

१ हजार ४५० मिटर लामो पानी ल्याउने सुरुङ खन्नुपर्ने भएकाले हालसम्म ३५० मिटर खन्ने कार्य सम्पन्न भएको छ ।

निर्धारित समयमा सम्पन्न गर्ने उद्देश्यले तनहुँ जलविद्युत् आयोजनाको काम तीव्ररूपमा भइरहेको आयोजनाका निमित्त प्रमुख राजभाई शिल्पाकारले जानकारी दिए । हाल आयोजनाको प्याकेज १ अन्तर्गत डाइभर्सन टनेल (पानी फर्काउने सुरुङ) को काम भइरहेको छ । प्याकेजको ठेक्का सोङ दा–कालिका जेभीले पाएको उनले बताए ।

प्याकेज २ अन्तर्गतको विद्युत्गृह खन्ने काम सकिएको छ । आयोजना निमित्त प्रमुख शिल्पकारका अनुसार पानी फाल्ने काम पनि सम्पन्न भएको छ ।

आयोजनाको प्याकेज २ अन्तर्गत सुरुङ, विद्युत् गृह निर्माण र हाइड्रोमेकानिकल तथा इलेक्ट्रोमेकानिकल उपकरण आपूर्ति, जडान तथा सञ्चालन लगायत कामको जिम्मेवारी सिनो हाइड्रोपावर लिमिटेडले पाएको छ । 

सिनो हाइड्रोपावर लिमिटेडले ८९ मिटर लम्बाइ, २२ मिटर चौडाइ र ५१ मिटर उचाइ भएको भूमिगत विद्यृत् गृहको सुरुङ खन्ने काम सकेको आयोजनाले जनाएको छ । विद्युत् गृहको सुरुङ खन्ने काम सन् २०२० अगस्तदेखि शुरू भएको हो । अब सुरुङभित्र पूर्वाधार निर्माणको काम पनि शुरू भइसकेको छ ।

आयोजनाको प्याकेज २ अन्तर्गत सर्च ट्रयाक जाने पहुँच सुरुङ खन्ने काम पनि सम्पन्न भइसकेको छ । 

सिनो हाइड्रो कम्पनीले ४३७ दशमलव १ मिटर लामो सुरुङ खन्ने काम सम्पन्न गरेको गरेको छ । २८० दशमलव ८५ मिटर लामो मुख्य पहुँच सुरुङ र बाँधस्थल जाने ३१४ मिटर लामो पहुँच सुरुङ निर्माण कार्य यसअघि नै सम्पन्न भइसकेको छ । प्याकेज ३ अन्तर्गत प्रसारण लाइन निर्माणका लागि २५ वटा टावर निर्माण सम्पन्न भएको छ । हालसम्म ४८ वटा फाउन्डेसनको कार्य सम्पन्न भएको छ ।