दोलखा प्रतिनिधिसभा सदस्यमा नेकपा (माओवादी केन्द्र) का गंगा कार्की विजयी भएपछि पराजय स्वीकार्दै नेकपा (एमाले) का जिल्ला कमिटी सचिव हिरा थोकरले पदबाट राजिनामा दिएको घोषणा गरेका छन् । 

मतगणनाको अन्तिम परिणाम आएलगत्तै सचिव थोकरले सामाजिक सञ्जालमा लेख्दै राजिनामा दिने घोषणा गरेका हुन् । माओवादी केन्द्रका उम्मेदवार गंगा कार्कीले ३१७ मतले एमालेका उम्मेदवार बालकृष्ण सिवाकोटीलाई पराजित गरेका थिए ।

कार्कीले ३६ हजार ७९९ मत प्राप्त गर्दा उनका प्रतिस्पर्धी सिवाकोटीले ३६ हजार ४८२ मत प्राप्त गरेका थिए । एमालेको गढ मानिएको दोलखामा माओवादी उम्मेदवारको जित भएपछि एमालेलाई धक्का लागेको छ । अहिले समानुपातिकको मतगणना जारी रहेको निर्वाचन अधिकृतको कार्यालयले जनाएको छ ।