१५ असार २०८३, सोमबार
नेपाल विज्ञान तथा प्रविधि प्रज्ञा प्रतिष्ठान (नाष्ट) ले युवा वैज्ञानिकहरुलाई अनुसन्धान सहयोगका लागि विभिन्न विधामा प्रस्ताव आव्हान गरेको छ । नाष्टले आज सूचना सार्वजनिक गर्दै सो आव्हान गरेको हो ।
नाष्टले बजेटको अधिकतम सीमा व्यक्ति, समूहगतको अनुसन्धानका लागि बढीमा पाँच लाख रुपियाँदेखि १२ लाख रुपियाँसम्मको प्रस्ताव आव्हान गरेको छ ।
यसैबीच, माध्यमिक विद्यालय स्तरका नवप्रवर्तन सम्बन्धी कार्यक्रम सञ्चालनका लागि बढीमा ५० हजार रुपियाँ, क्याम्पस स्तर (स्नातक) का विद्यार्थीबाट गरिने अनुसन्धानात्मक एवम् नवप्रवर्तन सम्बन्धी कार्यक्रम सञ्चालनका लागि एक लाख रुपियाँ र वैज्ञानिक समाज, प्रविधि समाज र संस्थाहरुले गर्ने अनुसन्धान वा प्रवर्धनात्मक कार्यक्रम सञ्चालन गर्न बढीमा एक लाख रुपियाँ प्रदान गर्ने पनि जनाएको छ ।
आर्थिक वर्ष २०७९-८० देखि सञ्चालित युवा वैज्ञानिकहरुलाई अनुसन्धान सहयोग कार्यक्रम अन्तर्गत ४० वर्ष ननाघेका युवा वैज्ञानिकलाई सो प्रस्ताव पेश गर्न संस्थाले आग्रह गरेको छ । इच्छुक व्यक्तिले सूचना प्रकाशित भएको २१ दिनभित्र प्रस्ताव पेश गरिसक्न संस्थाले भनेको छ ।
