१७ असार २०८३, बुधबार
अमेरिकाको नर्थ क्यारोलाइनामा रहेका दुईवटा विद्युत् स्टेसनमा आक्रमण गरी हजारौं मानिसलाई असर पार्ने घटना सार्वजनिक भएपछि एफबीआईलाई अनुसन्धानका लागि बोलाइएको छ ।
मूर काउन्टीभरि विभिन्न कार्यालय, पसल र रेस्टुराँहरू बन्द हुन बाध्य भएका छन् । ट्राफिक बत्ती निभेका छन् र आपतकालीन आश्रयस्थल बनाइएका छन् ।
राज्यभरि संकटकाल घोषणा गरिएको छ । सोमवार विद्यालयहरू बन्द गरिएका थिए भने मंगलवार पनि बन्द नै रहनेछन् ।
शुक्रवारसम्म रातिरातिका लागि कर्फ्यु लगाइएको छ ।
कुल ३८ हजार घर विद्युत् आपूर्तिको अभाव झेलिरहेका छन् । जाडोमा कठ्यांग्रिने स्थिति रहेकोमा बिजुलीबत्ती नहुँदा स्थानीयहरूको बिजोक भएको छ ।
नर्थ क्यारोलाइनाका गभर्नर रोय कूपरले यस घटनाबाट नयाँ किसिमको जोखिम तेर्सिएको बताए । विद्युत् ग्रिड लगायतका महत्त्वपूर्ण संरचनाको सुरक्षाका लागि थप प्रभावकारी उपाय अपनाइनुपर्ने बताएका छन् ।
यस आक्रमणलाई घरेलु आतंकवादका रूपमा अनुसन्धान गरिन्छ कि भनी सोध्दा अनुसन्धानकर्मीहरूले सबै कोणबाट हेरिरहेको कूपरले बताए ।
आपराधिक उद्देश्यका साथ कसैले विद्युत् स्टेसनमा गोली प्रहार गरेको प्रहरीको भनाइ छ ।
रुसले युक्रेनका विद्युत् संरचनामा आक्रमण गरी युक्रेनीहरूलाई कठ्यांग्रिदो जाडोमा बस्न बाध्य बनाएको जस्तै अमेरिकामा आएको हो ।
