गुल्मीमा निर्माणधिन लखन थापा अन्तर्राष्ट्रिय फुटवल रंगशाला रकम अभावले अलपत्रजस्तै परेको छ । इश्मा गाउँपालिका ६ अमरपुरको बुल्म चौरमा निर्माणधिन रंगशाला निर्माणको पर्खाइमा बसेको बर्सौ भएको छ । 

राष्ट्रिय खेलकुद परिषदको २ करोड ८० लाख रुपियाँमा माटो काटने, पर्खाल लगाउने र दुवो रोप्ने कार्यका लागि सहयोग गरेको थियो । २०७५ चैतमा सुनकोसी अभियान जेभी काठमाडौसँग सम्झौता भए पनि कामले निरन्तरता पाउन सकेन । एक वर्षसम्म काम भए पनि सो पछि रकम अभाव भन्दै कामले गति लिन सकेन । 

निर्माण कार्य अघि बढ्न नसक्दा रंगशालामा लगाइएका पर्खाल पनि भत्किन थालेका छन । मैदानमा खाल्डाखुल्डी परेर समस्या भएको स्थानीय खेलाडीको गुनासो छ । करिब १ अर्व रुपियाँ लागतमा  निर्माण गरिने लक्ष्य लिइएको १०५ मिटर लम्वाई र ६८ मिटर चौडाइको सो रंगशालाका लागि कभर्डहल र स्वीमिङ पुलसहितको डीपीआर तयार गरिएको थियो । 

रकम अभाबका कारण काम अलपत्र परेको राष्ट्रिय खेलकुद परिषद निर्माण शाखाका प्राबिधिक माधब देवकोटाले बताए । आवश्यक बजेट प्राप्त भएमा काम अगाडि बढाउने उनले बताए । रगशाला बनाउने नाममा स्थानीय चौरको पहिचान मेटिए पनि रंगशाला नबन्दा दुःखलागेको स्थानीय ओमबहादुर कुमालले बताए ।

पहिलेको चौरमा गाई बाख्रा चराउने र रातो माटो खनेर दशैंमा घर लिपपोत गर्न सहज भए पनि अहिले रगशाला निर्माणको कामले चौरमा खाल्डाखुल्डी मात्र भएको उनले गुनासो गरे । काम सम्पन्न भएको भए राम्रो हुने थियो, अधुरो काम छाडेर चौर विगार्ने काम मात्र भएको उनले बताए । 

युवाहरुका लागि खेलकुद आवश्यक भएकाले रंगशाला निर्माण गर्नु राम्रो भए पनि काम हुन नसक्दा समस्या भएको स्थानीय कुशुम मुखियाले बताइन् । निर्माणको काम छिटो हुनुपर्ने उनले माग गरिन् । इश्मा गाउँपालिकाले रंगशाला निर्माणका लागि आफूहरुसँग कुनै समन्वय नभएको जनाएको छ ।