१५ असार २०८३, सोमबार
अफगानिस्तामा सत्तारूढ तालिबानले देशको उत्तरी भागमा रहेको अमु दरियाबाट तेल उत्खनन गर्नका लागि एक चिनियाँ कम्पनीसँग सम्झौता गरेको छ ।
देशको जर्जर अर्थतन्त्रलाई उकास्नका लागि यो सम्झौता गरिएको हो ।
चीनको सिन्ज्याङ सेन्ट्रल एसिया पेट्रोलियम यान्ड ग्यास कोले तालिबानसँग सम्झौता गरेको हो । सन् २०२१ मा सत्ता हातमा लिएयता तालिबानले गरेको ऊर्जा उत्खननसम्बन्धी यो प्रमुख अन्तर्राष्ट्रिय सम्झौता हो ।
यो सम्झौता काबुलमा गरिएको हो । सम्झौता समारोहमा तालिबानका अर्थ राज्यमन्त्री मुल्ला अब्दुल गनी बारादर र अफगानिस्तानका लागि चिनियाँ राजदूत वाङ यु उपस्थित थिए ।
बारादरले यो सम्झौता अफगानिस्तानको हितमा रहेको बताए । यसले देशको अर्थतन्त्रलाई बलियो बनाउने उनको भनाइ छ ।
‘प्राकृतिक स्रोतको सवालमा अफगानिस्तान धनी मुलुक हो । यहाँ अन्य खनिजका अलावा तेल पनि छ जसमा देशको अर्थतन्त्र निर्भर रहन सक्छ,’ बारादरले बताए ।
सम्झौताबमोजिम चिनियाँ कम्पनीले वर्षको १५ करोड डलरसम्म लगानी गर्नेछ । यो तीन वर्षमा बढेर ५४ करोड डलर पुग्नेछ । यस परियोजनाले तीन हजार अफगानीहरूलाई रोजगारीको अवसर दिलाउने बताइएको छ ।
