सन् २०२२ को पीएमजीसी ग्रान्ड फाइनलमा उपविजेता बनेको पबजी मोबाइल टोली डीआरएस गेमिङको विजयलाई भायानेट कम्युनिकेसनको कार्यालय परिसरमा मनाइएको छ ।

भायानेट कम्युनिकेसन डीआरएसको आईएसपी पार्टनर, प्रायोजक र लामो समयदेखि समर्थक हो । कम्पनीद्वारा आयोजित एक कार्यक्रममा डीआरएसका टोली सदस्य दीपेश गुरुङ, शाहस भण्डारी, सुविन कुमार प्रजापति र समर गुरुङलाई भायनेटका प्रमुख कार्यकारी अधिकृत सेवा पाठक बोहराले सम्मान गरे ।

कार्यक्रममा डीआरएसले पीएमजीसी ग्लोबल च्याम्पियनसिपको आफ्नो फाइनलसम्मको प्रेरणादायी यात्रा र उनीहरूको ग्लोबल पीएमजीसी एरेनामा अगाडि बढ्न नेपालको इन्टरनेट कनेक्टिभिटीको भूमिकाबारे बोलेका थिए । उनीहरूले नेपालको इन्टर्नेट कनेक्टिभिटीले नेपाली इस्पोर्ट उद्योगलाई विकसित गर्न र व्यावसायिक गेमरहरूलाई विश्वव्यापी प्रतिस्पर्धा गर्न अनुमति दिने अन्तर्राष्ट्रिय स्तरको बनाउनका लागि लामो यात्रा गरेको उल्लेख गरे । डीआरएस गेमिङका अपरेसन प्रमुख संगिन भट्टराईले कम पिङ, स्थिर जडान र शीघ्र सेवाका कारण नै भायानेटको इन्टरनेट उनीहरूको पहिलो रोजाइमा परेको पनि बताए ।

भायानेट सीईओ सेवा पाठक बोहराले कम्पनी गेमरहरूको रोजाइको इन्टरनेट बन्न प्रतिबद्ध रहेको र गेमिङलाई नेपालमा प्रोत्साहन गर्नका लागि गेमिङ लक्षित उत्पादनलाई थप विस्तार गर्दै लैजाने लक्ष्य रहेको बताए । कार्यक्रममा बोहराले कम्पनीले नेपालको ईस्पोर्ट उद्योगलाई सहयोग र समर्थन गर्न जारी राख्ने प्रतिबद्धता पनि व्यक्त गरे ।

नेपालको सबैभन्दा लोकप्रिय पबजी टोलीहरूमध्ये एक डीआरएस गेमिङले ८ जनवरीमा इन्डोनेसियाको जकार्तामा आयोजित सबैभन्दा ठूलो पबजी गेमिङ प्रतियोगितामा विश्वभरका ५१ उत्कृष्ट टोलीहरूमध्ये उपविजेता बनेर इतिहास रचेको थियो । टोलीका सदस्यहरूले ऐतिहासिक प्रदर्शनको लागि २ लाख डलर नगद राशि जित्न सफल भएका थिए ।  

डीआरएसको ऐतिहासिक जीतले नेपाल र नेपालीका लागि गेमिङको सम्भावना देखाउने कम्पनीले जनाएको छ । विकासशील देशको सीमितताहरूको बाबजुद इन्टरनेट प्रविधिमा भइरहेको तीव्रगतिको सुधारका कारण आफ्नो सपना पछ्याउन इच्छुक गेमरहरूलाई प्रशस्त सम्भावना रहेको छ । नेपालको अग्रणी इन्टरनेट र आईपीटीभी सेवा प्रदायकमध्ये एक भायानेटले यो सम्भावनालाई यथार्थमा बदल्न सहयोग गर्न चाहेको कम्पनीले जनाएको छ ।
 
नेपालको अग्रणी इन्टरनेट र आईपीटीभी सेवा प्रदायकमध्ये एक भायानेट सन् १९९९ मा स्थापना भएको थियो । आफ्नो स्थापनादेखि नै भरपर्दो र किफायती ब्रोडब्यान्ड इन्टरनेट सेवाहरू प्रदान गर्नमा अग्रणी स्थानमा रहेको कम्पनीले सन् २०११ मा सामान्यतया एफटीटीएएच भनेर चिनिएको फाइबर अप्टिक्स इन्टरनेटलाई पहिलो पटक नेपालमा ल्याएको थियो । यसरी विना कुनै पनि सेरिङ रेसियो इन्टरनेट सेवा प्रदान गर्ने पहिलो कम्पनी बनी भायानेटले नेपालमा इस्पोर्ट गेमिङ उद्योग स्थापना गर्ने आधार तय गर्नमा अग्रणी भूमिका निभाउँदै आएको जनाइएको छ ।