२२ जेठ २०८३, शुक्रबार
सुर्खेतको झुप्राखोला नजिकमा आइतबार बिहान जिप दुर्घटना हुँदा चार जनाको ज्यान गएको प्रहरीले जनाएको छ । जिप आज विहान साढे २ बजे दुर्घटना भएको हो । प्रहरीका अनुसार सुर्खेतको भेरीगंगा नगरपालिका छिन्चुबाट वीरेन्द्रनगरतर्फ आउँदैगरेको बा. प्र ०१०२६च ९२१३ नम्बरको डबल क्याप गाडी रत्न राजमार्गअन्तर्गत वीरेन्द्रनगर ११ झुप्राखोला नजिक दुर्घटना भएको थियो ।
प्रहरीका अनुसार सो गाडी अनियन्त्रित भई सडकबाट करिब ८० मिटर तल खसेको छ । दुर्घटनामा चालक वीरेन्द्रनगर नगरपालिका ७ निवासी २७ वर्षीय सागर शाही, दैलेखका डुङ्गेश्वर गाउँपालिका ५ का ३३ वर्षीय दीपन्द्रजंग शाही, दैलेखकै भगवतीमाई गाउँपालिका ५ का वर्ष ३१ का बबिन शाही र दैलेखकै गुराँस गाउँपालिका ३ का वर्ष ३६ का राजेन्द्र बीसीको मृत्यु भएको छ ।
दुर्घटना भएको जानकारी पाए लगत्तै घाइते अवस्थामा प्रहरीले उद्धार गरी उपचारका लागि घाइतेहरुलाई कर्णाली प्रदेश अस्पताल लगेको थियो । उपचारका क्रममा उनीहरूको मृत्यु भएको प्रहरीले जनाएको छ।
दुर्घटनामा दैलेखकै भैरवी गाउँपालिका ५ का २६ वर्षीय वीरेन्द्रराज शाही घाइते छन्। छातीमा चोट लागेका उनी बोल्न सक्ने अवस्थामा भएको प्रहरीले जनाएको छ । उनको उपचार भइरहेको प्रहरीले जनाएको छ । दुर्घटना के कति कारणले भएको हो भन्नेबारे अनुसन्धान भइरहेको सुर्खेत प्रहरीले जनाएको छ ।
