०५ साउन २०८३, मंगलबार
बिचौलियाको काम गरेको अभियोगमा धनुषा जिल्ला प्रशासन कार्यालयबाट एक बिचौलिया बनेर सर्वसाधारणलाई दुःख दिने एक जना पक्राउ परेका छन्।
जनकपुरधाम उपमहानगरपालिका-१६ कपिलेश्वर बस्ने ३९ वर्षीय दीपक ठाकुरलाई जिल्ला प्रशासन कार्यालय धनुषाको गेट अगाडिबाट मंगलबार दिउँसो प्रहरीले पक्राउ गरेको छ ।
जिल्ला प्रशासन कार्यालय धनुषामा नागरिकता, राहदानी बनाउन आउने सेवाग्राहीहरूलाई उनले सोही कार्यालयका कर्मचारीहरूसँग चिनजान रहेको र काम छिटो गराइदिन्छु भनी प्रतिव्यक्ति २ देखि ३ हजार रुपैयाँका दरले पैसा उठाउने गरेको सूचना आएपछि उनलाई प्रहरीले पक्राउ गरेको जनाएको छ।
जिल्ला प्रहरी कार्यालय धनुषाबाट खटिएको प्रहरीले ठाकुरलाई सेवाग्राहीसँग १ हजार ५ सय रुपैयाँ लिँदै गरेको अवस्थामा फेला पारेको हो।
यस सम्बन्धमा प्रहरीले थप अनुसन्धान गरिरहेको जनाएको छ।
