कम्प्युटर एसोसिएसन नेपाल (क्यान) महासङ्घले माघको अन्तिम साता २८ औँ क्यान इन्फोटेक मेला आयोजना गर्ने बताएको छ । सूचना तथा सञ्चार प्रविधि क्षेत्रमा विकसित नयाँ प्रविधि प्रदर्शनी र यस क्षेत्रको विकासका लागि आवश्यक रणनीति निर्माणका लागि माघ २४ देखि २९ सम्म भृकुटीमण्डपस्थित प्रदर्शनी मार्गमा मेला आयोजना गर्न लागिएको क्यानले जनाएको छ । 

मेलाबारे जानकारी दिन बिहीबार राजधानीमा आयोजित पत्रकार सम्मेलनमा महासङ्घका अध्यक्ष रणजित पोदारले इन्फोटेकको तयारी अन्तिम चरणमा पुगेको बताए । मेलामा सूचना तथा सञ्चार प्रविधि क्षेत्रका भित्रिएका नवीनतम प्रविधि तथा सेवाको विशेष प्रदर्शनी तथा सरोकारवालाबीच गहन छलफल हुने उनको भनाइ छ । 

प्रदर्शनीमा सञ्चार तथा सूचना प्रविधि मन्त्रालय, सूचना प्रविधि विभाग, नेपाल दूरसञ्चार प्राधिकरण, नेपाल उद्योग वाणिज्य महासङ्घ, नेपाल चेम्बर अफ कमर्स, नेपाल उद्योग परिसङ्घ, सुबिसुलगायतका संस्थाको सहकार्य रहने क्यानले जनाएको छ । सन १९९५ देखि हरेक वर्ष आयोजना हुँदैआएको मेला यसपटक सातै प्रदेशमा आयोजना गर्ने क्यानले बताएको छ ।