०२ साउन २०८३, शनिबार
विश्वका विकसित मुलुकहरूको समूह जी७ का सदस्य मुलुकमध्ये बेलायत मात्र यो वर्ष आर्थिक मन्दीको चपेटामा पर्ने देखिएको छ ।
अन्तर्राष्ट्रिय मुद्रा कोषले गरेको प्रक्षेपणअनुसार, बेलायतको कुल गार्हस्थ्य उत्पादन सन् २०२३ मा ०.६ प्रतिशतले खुम्चिनेछ ।
विकसित मुलुकहरूमध्ये अरू कुनै पनि आर्थिक संकटको स्थितिमा पुग्ने अपेक्षा गरिएको छैन । पश्चिमले आर्थिक प्रतिबन्ध लगाएको रुसको अर्थतन्त्र समेत ०.३ प्रतिशतले बढ्ने अपेक्षा छ ।
बेलायतका अर्थमन्त्री जेरेमी हन्ट तथा अन्य मन्त्रीले निराशाजनक भविष्यवाणीहरू विगतमा पनि नमिल्ने गरेको टिप्पणी गरेका छन् ।
तर सत्तारूढ टोरी पार्टीले करकटौती गर्नका लागि राखेको मागलाई हन्टले पूरा गर्न नसक्ने स्थिति छ ।
प्रधानमन्त्री ऋषि सुनक र हन्टले आगामी मार्च महिनामा ल्याइने बजेटमा राज्यकोषमा परेको भार घटाउने प्रस्तावलाई अस्वीकार गरेका छन् । महंगी नियन्त्रणमा नआउन्जेल जनतालाई राज्यले दिने सुविधा जारी रहने उनीहरूको भनाइ छ ।
