अमेरिकाको लास भेगासमा अघिल्लो शुक्रवार एउटा कार सडकको बीचमा रहेको ताडको रुखमा ठोकिएको थियो । 

त्यही बेलामा जस्टिन माउसर र उनकी पत्नी बाटोमा हिँडिरहेका थिए । 

ठोकिएको कारबाट कोही पनि बाहिर ननिस्केको उनीहरूले विचार गरे । 

लास भेगास बुलेभार्डमा बीएमडब्ल्यू कारबाट धूवाँ निस्केको देखेपछि माउसरले कार चालकलाई बाहिर निकाल्न कोशिश गरेका थिए । 

लास भेगास मेट्रोपोलिटन पुलिस डिपार्टमेन्टले जारी गरेको भिडियोमा देखिएअनुसार, माउसर र अन्यले कारको ढोका खोलेर चालकलाई बाहिर निकाल्न प्रयास गरे । 

‘सडकपारि मानिसहरू कारमा अझै पनि आगो लागेको छ भनिरहेका थिए,’ माउसरले भने, ‘तर आगो धेरै फैलिन पाएको छैन भन्ने देखेपछि मैले बचाउनका लागि कोशिश गरें ।’

माउसर र लास भेगास प्रहरीका एक अधिकृतले बेहोश भएका चालकलाई सीटबाट बाहिर निकालेका थिए । कारमा हुरुरु आगो लाग्नुअघि उनीहरूले चालकलाई बाहिर निकाल्न सफलता पाएका थिए । 

घटनामा माउसरलाई कुनै चोट लागेन भने प्रहरी अधिकृतलाई धूवाँ निलेकोमा अस्पताल लगिएको थियो ।