२५ जेठ २०८३, सोमबार
भारतको अयोध्यामा नेपालबाट लगिएको शालिग्राम शिलाको बिहीवार धुमधाम पूजा गरिएको छ ।
शिलालाई रामसेवकपुरममा कडा सुरक्षा व्यवस्थाका साथ राखिएको छ ।
यसैबीच शिलाको विषयमा विवाद पनि शुरू भएको छ । तपस्वी छाउनीका पीठाधीश्वर महन्त परमहंस दासले शालिग्राममा भगवान् प्रतिष्ठित भएकाले त्यसमा हतौडा चलाउन सही नभएको उनको भनाइ छ । शिलामा हतौडा चलाइएमा आफूले अन्नजल त्याग्ने उनको भनाइ छ ।
उता अयोध्या हिन्दू महासभाका राष्ट्रिय प्रवक्ता अधिवक्ता मनीष पाण्डेले नेपालको गण्डक नदीबाट निकालिएको विशालकाय शालिग्राम पत्थरबाट भगवान् रामको मूर्ति बनाइएमा महाविनाश हुने निश्चित रहेको बताएका छन् । मन्दिरमा सुनको मूर्ति प्रतिष्ठित गर्नुपर्ने उनको भनाइ छ ।
महासभाले आक्रोश प्रकट गर्दै गण्डक नदीबाट निकालिएको शालिग्राम पत्थर फर्काउनुपर्ने बताएको छ ।
शिलाहरूलाई नेपालबाट अयोध्या लगेका राम मन्दिर ट्रस्टका प्रमुख सदस्य कामेश्वर चौपालले यी शिला शालिग्राम नै भएको बताए । यसबाट भगवानको मूर्ति बन्ने निश्चित रहेको उनको भनाइ छ । तर मूर्ति कहाँ स्थापित गर्ने र गर्भगृहको मूर्ति पनि यसै शिलाबाट बन्ने हो कि भन्ने विषयमा राम मन्दिर ट्रस्टले अन्तिम फैसला गर्ने उनले बताए ।
शिलालाई अयोध्या ल्याउनुअघि नेपाल सरकारले वैज्ञानिक परीक्षण गराएको पनि उनले जानकारी दिए ।
