०४ असार २०८३, बिहीबार
बेलायतको सैन्यबल कमजोर भएकाले रुसविरुद्ध भिड्नुपर्ने स्थिति आएमा अग्रपंक्तिमा रहन नसक्ने नेटोका प्रमुखहरूले चिन्ता व्यक्त गरेका छन् ।
सन् २०२३ को अन्त्यमा बेलायतले नेटोको र्यापिड रियाक्सन फोर्सको नेतृत्व जर्मनीसँग लिनेछ । तर जर्मनीका सञ्चारमाध्यममा आएका खबरअनुसार, बेलायतले ५ हजार सैनिक उपलब्ध गराउन नसक्ने भएकाले नेटोले जर्मनीलाई थप एक वर्ष नेतृत्वमा रहन अनुरोध गरेको छ ।
बेलायतको रक्षा मन्त्रालयको एक स्रोतले जर्मन पत्रिकालाई बतायो, ‘रक्षा क्षेत्रमा कम खर्च गरिएकाले गोलीगट्ठा तथा अन्य हतियारको गम्भीर समस्या छ । त्यसमाथि युक्रेनलाई हातहतियार दिएकाले हामीसँग हतियारको अभाव छ ।’
‘अनि युक्रेनी सैनिकहरूलाई प्रशिक्षण दिइरहेकाले हाम्रा सैनिकहरू पनि युद्धमा जान सक्ने स्थितिमा छैनन् ।’
मार्च महिनामा बेलायतले बजेट प्रस्तुत गर्दैछ । त्यसमा सेनालाई अतिरिक्त रकम नछुट्ट्याइएमा बेलायतले आफ्नो रक्षा समेत गर्न नसक्ने डर उत्पन्न भएको छ ।
बेलायत दोस्रो विश्वयुद्धपछि सबभन्दा कमजोर स्थितिमा रहेको त्यहाँका वरिष्ठ सैन्य अधिकृतहरू बताउँछन् । विगत चार शताब्दीमा बेलायती सेनाको संख्या सबभन्दा कम छ भने सन् १९८२ को फाकल्यान्ड्स युद्धमा भएको बेलायती जलसेनाको संख्याभन्दा आधा कम सैनिकहरू अहिले छन् ।
