युक्रेनलाई रुससँग कुराकानी गर्नका लागि पश्चिमा मुलुकहरूले दबाब दिन खोजेको जर्मनीको बिल्ड पत्रिकाले सोमवार खबर दिएको छ । 

वाशिङटन र बर्लिनका अज्ञात स्रोतहरूलाई उद्धृत गर्दै बिल्डले अबका केही महिनाभित्र युक्रेनले गुमेका भूभाग फिर्ता लिन नसकेमा पश्चिमले युक्रेनलाई रुससँग वार्ता गर्न दबाब दिने लेखेको छ । 

अमेरिका र उसका साझेदारहरूले नयाँ हतियारहरू उपलब्ध गराएर युक्रेनलाई भूभाग फिर्ता गर्नका लागि सहयोग गर्ने भएका छन् । तर त्यसको सकारात्मक परिणाम नआएमा उनीहरूले वार्ताका लागि दबाब दिने बिल्डको दाबी छ । 

यसअघि द वाल स्ट्रीट जर्नलले युक्रेनलाई रुससँग सम्झौताका लागि तयार पार्न बेलायत, फ्रान्स तथा जर्मनीले हतियार तथा सुरक्षा प्रतिबद्धता दिएको खबर दिएको थियो । नेटोको सदस्यता नदिए पनि त्यही हैसियतको सुरक्षा प्रत्याभूति युक्रेनलाई दिनका लागि ती देशहरू तयार रहेको बताइएको छ ।