विगत तीन महिनामा इरानका विभिन्न विद्यालयमा अध्ययनरत बालिकाहरूलाई कक्षाकोठामा विषालु धूवाँमार्फत आक्रमणका घटनाहरू सार्वजनिक भएका छन् । 

त्यस धूवाँका कारण केही बालिकाहरू अस्पताल भर्ना समेत हुनुपरेको छ । 

इरानी अधिकारीहरूले शुरूमा यस घटनालाई खासै वास्ता नगरेको भए पनि अहिले आएर यी जानाजान गरिएका आक्रमण भएको स्वीकार गरेका छन् । लगभग ३० वटा विद्यालयमा यस्ता आक्रमण भएको स्थानीय सञ्चारमाध्यमहरूले खबर दिएका छन् । 

विद्यालयमा छात्राहरूलाई आउनबाट रोक्नका लागि यो आक्रमण गरिएको हुन सक्ने अनुमान गरिएको छ । 

गत सेप्टेम्बर महिनामा माहसा अमिनी नामक युवतीलाई देशको धार्मिक प्रहरीले पक्राउ गरेपछि हिरासतमा उनको मृत्यु भएको थियो । त्यसको विरोधमा लामो समयसम्म इरानमा सरकारविरोधी प्रदर्शन चलेको थियो । 

अहिले भइरहेका धूवाँ आक्रमणमा को जिम्मेवार छ भनी अधिकारीहरूल सुनिश्चित गर्न सकेका छैनन् । तर शिक्षाको खोजीमा विद्यालय गएका बालिकाहरूलाई जानाजान आक्रमण गरिएको हुन सक्ने आशंका व्यक्त गरिएको छ । 

सन् १९७९ मा भएको इस्लामी क्रान्तिपछि इरान कट्टर बनेको भए पनि छात्राहरूलाई शिक्षाबाट वञ्चित गरिएको थिएन । इरानले छिमेकी मुलुक अफगानिस्तानमा समेत बालिका र महिलालाई विद्यालय जान दिन तालिबानसमक्ष अनुरोध गरेको छ ।