१० असार २०८३, बुधबार
प्रधानमनत्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’का घरबेटी ठेकेदारले वर्षाैंदेखि अलपत्र पारेको कमलविनायक–नगरकोट सडकको उपप्रधानमन्त्री नेतृत्वको सरकारी टोलीले अवलोकन गरेको छ ।
उपप्रधान एवं भौतिक पूर्वाधार तथा यातायात मन्त्री नारायणकाजी श्रेष्ठले बिहीवार नगरकोट सडकको अवलोकन गरेका हुन् ।
प्रचण्डलाई खुमलटारमा बास दिएका शारदा अधिकारीको सैलुङ कन्टक्सनले नगरकोट सडकको जिम्मा पाएको छ । सन् २०१४ मा सम्झौता भएको सडक ९ वर्षसम्म बन्न सकेको छैन । सडकको अवलोकनपछि मन्त्री श्रेष्ठले ठेकेदार कम्पनीलाई बोलाएर स्पष्टीकरण लिने बताए ।
‘कससँगको सम्बन्ध भन्ने थाहा भएन, सरकारसँग सम्झौता भएको कम्पनीले काम नगरे कारवाही हुन्छ,’ श्रेष्ठले भने ।
एक्जिम बैंकको सस्तो ऋणमा विस्तार गर्न लागिएको सडकको काम समयमै पूरा नगर्दा नगरकोट जानेले धुलाको सास्ती व्यहोर्नुपरेको छ । बिहीवार नारायणकाजीसँगै नेपालका लागि भारतीय राजदूत नवीन श्रीवास्तव पनि सहभागी थिए ।
पुस ११ गते उपप्रधानमन्त्री बनेलगत्तै नारायणकाजीले उपत्यकाका सडक अनुगमन गरेका थिए । १५ दिनभित्र सडकका खाल्डा पुर्न निर्देशन दिए पनि कार्यान्वयन भने भएको छैन । मन्त्री अनुमगनमा आउने थाहा पाएपछि नगरकोट सडकमा पानी हालेर धुलो मारिएको थियो ।
राजनीतिक नेताको संरक्षणमा ठेकेदार अधिकारीले सडकको काम पूरा नगरेर जनतालाई सास्ती दिएको भन्दै भक्तपुरका सांसद प्रेम सुवालले दर्जनौं पटक संसदमा आवाज उठाइसकेका छन् ।
