०९ असार २०८३, मंगलबार
चितवन जिल्लाको कालिका नगरपालिका–७ स्थित पदमपुर सामुदायिक वन क्षेत्रसँग जोडिएको संरक्षित क्षेत्रमा एउटा पाटेबाघ मृतावस्थामा भेटिएको छ ।
संरक्षित क्षेत्रको केउरेनी घोलमा शनिवार दिउँसो बाघ मृत भेटिएको हो ।
जिल्ला वन कार्यालय चितवनका सूचना अधिकारी बालकृष्ण खनालका अनुसार अन्दाजी ६ वर्षको भाले बाघ खानामा विष परेकाले मरेको हुनसक्ने अनुमान छ । शनिवारै शव परीक्षण गरेर बाघको नमूना परीक्षण शुरू गरिएको छ ।
बाघको मुख र मलद्वारमा सेतो फिँज र पेटमा बाख्राको अंग भेटिएको उनले जानकारी दिए । यस वर्ष राष्ट्रिय वन क्षेत्रमा बाघ मरेको पहिलो घटना हो ।
गत वर्ष वन क्षेत्रमा बाघ मरेको थिएन । जिल्लाको राष्ट्रिय वन क्षेत्रमा १२ देखि १४ बाघ रहेका अनुमान छ ।
