फिनल्यान्ड संसारको सबभन्दा खुशी मुलुकको सूचीमा लगातार छैटौंपटक पहिलो स्थानमा परेको छ । 

एक दशकभन्दा बढी अवधिदेखि प्रकाशित गर्दै आइएको यस सूचीमा अभूतपूर्व उपलब्धि हासिल गर्न फिनल्यान्ड सफल भएको हो ।

संयुक्त राष्ट्रसंघको दिगो विकास समाधान सञ्जालले सोमवार सार्वजपनक गरेको विश्व खुशी प्रतिवेदनमा फिनल्यान्डले अरू मुलुकहरूभन्दा निकै धेरै अंक ल्याएको उल्लेख छ । दोस्रो स्थानमा डेनमार्क र तेस्रोमा आइसल्यान्ड छन् । 

नेपाल ७८औं स्थानमा छ । त्यस्तै चीन ६४ र भारत १२५औं स्थानमा छन् । 

सबभन्दा पुछारमा लेबनन र अफगानिस्तान छन् । 

‘आय, स्वास्थ्य, भरपर्दो मानिसको साथ, जीवनको निर्णय लिनका लागि स्वतन्त्रता, उदारता तथा भ्रष्टाचारको अभावले मानिसको खुशियालीमा बलियो भूमिका खेल्छन्,’ प्रतिवेदनमा उल्लेख गरिएको छ । 

सन् २०२० देखि २०२२ सम्म तीन वर्षको अवधिलाई यस प्रतिवेदनले समेटेको छ ।