नेपालकै लोकप्रिय एप हाम्रो पात्रोअन्तर्गत डिजिटल वालेट 'हाम्रो पे' शुरू भएको एक महिनामै एक लाखभन्दा बढी प्रयोगकर्ता जोडिएका छन् ।

हाम्रो पात्रोका प्रयोगकर्ताले छुट्टै एप डाउनलोड गर्नु नपर्ने र सहजै खाता खोल्न सकिने भएकाले प्रयोगकर्ताको आकर्षण उल्लेख्य देखिएको हो । 

हाम्रो पे विशेषगरी मोबाइल टपअप, बिजुली, खानेपानी, इन्टरनेट, टीभीलगायत बिल तिर्न बढी प्रयोग हुन थालेको छ । यसबाहेक नेपाल पे क्युआर राखिएका मर्चेन्ट, विभिन्न सुपर स्टोर तथा ग्रोसरी स्टोरलगायत स्थानमा समेत हाम्रो पात्रोबाटै भुक्तानी गर्न सकिन्छ ।

प्रयोगकर्ताले एपमा रहेको ‘स्प्लिट एण्ड पे’ फिचर निकै रुचाएको कम्पनीले  जनाएको छ ।

हाम्रो पात्रोलाई नेपालको सुपर एप बनाउने उद्देश्यका साथ कम्पनीले गत ५ फागुनमा डिजिटल भुक्तानी सेवाको रूपमा हाम्रो पे ल्याएको थियो ।

जसमा ‘स्प्लिट एण्ड पे’का साथै कहाँ कति खर्च भइरहेको छ भन्ने कुरा थाहा पाउन खर्च ट्र्याक गर्ने, विभिन्न ६ ओटा स्थानीय भाषामा प्रयोग गर्न सकिने जस्ता मौलिक फिचरसमेत रहेका छन् । 

त्यस्तै प्रयोगकर्ताको सहजताका लागि 'लाइभ च्याट सपोर्ट’ समेत उपलब्ध छ ।

हाम्रो पेलाई आगामी दिनमा हाम्रो पात्रोमा उपलब्ध हुने मिनी एपमार्फत गरिने खरिदको भुक्तानीमा समेत प्रयोग गर्न सकिने छ ।