१६ असार २०८३, मंगलबार
अमेरिकाका ठूला शहरलाई आगामी ७७ वर्षभित्र समुद्रले निल्ने प्रक्षेपण गरिएको छ ।
न्युजील्यान्डको क्यान्टरबरी विश्वविद्यालय तथा अमेरिकाको मेरील्यान्ड विश्वविद्यालयका वैज्ञानिकहरू टम लोगन र एलिसन रीलीले गरेको अध्ययनपछि यो भविष्यवाणी गरिएको हो । आफ्नो अध्ययनमा उनीहरूले अमेरिकाको स्थिति आगामी दशकहरूमा झन् झन् खराब हुँदै जाने बताए ।
सन् २१०० सम्म अमेरिकामा ९० लाखदेखि १ करोड २० लाखसम्म मानिसहरू समुद्रको बढ्दो जलस्तरबाट प्रभावित हुने उनीहरूको प्रक्षेपण छ ।
सामुद्रिक तुफान तथा बाढीको समस्या आइरहने बताइएको छ । त्यसले ठूला शहरको तटीय क्षेत्र समुद्रमा डुबाइदिन्छ । ती क्षेत्रहरू काटिएर टापु बन्न सक्ने सम्भावना पनि छ ।
अझ चक्रवात आएमा त्यसले ल्याउने विनाश विशाल हुनेछ ।
वैज्ञानिकहरूले यसका लागि तीनवटा मानक तयार पारेका छन् । कति तापक्रम बढ्दाखेरी ०.५ मिटर, १ मिटर वा २ मिटर जलस्तर बढ्नेछ भनी मानक बनाइएको छ । दुई मिटर जलस्तर बढेमा अमेरिकाको ठूलै क्षेत्र पानीमा डुब्नेछ ।
गत नोभेम्बर महिनामा नासाले गरेको अध्ययनमा सन् २०५० पछि नै अमेरिकाका लगभग सबै तट बढ्दो सामुद्रिक जलस्तरका कारण डुब्ने प्रक्षेपण गरिएको थियो ।
अनि सानातिना तुफानहरूका कारण समुद्री बाढी आउने खतरा पनि छ । न्युयोर्क, सान फ्रान्सिस्को, लस एन्जलस र भर्जिनिया जस्ता तटीय राज्यहरू समुद्रमा डुब्ने जोखिम छ ।
विश्व तापक्रममा वृद्धि अर्थात् ग्लोबल वार्मिङका कारण ध्रुवीय हिउँ पग्लिरहेको र त्यसले पनि समुद्रको जलस्तर बढाएको नासाको अध्ययनमा देखिएको छ ।
त्यसको असर अमेरिकामा मात्र नभई संसारभरि पर्नेछ ।
