गाउँसम्मै सडक कालोपत्र भएपछि पाँचथरको फदिम नगरपालिका–११ का देवीप्रसाद अधिकारी प्रशन्न छन् । सडक कालोपत्रे गरेका कारण समयमै गाडी पाउन र फिदिम पुग्न सहज भएको उनी बताउँछन् ।

उत्पादित सागसब्जी बजार पुर्‍याउन सकिएको अधिकारीको भनाइ छ । 

‘यातायातको सुविधा नहुँदा फिदिम पुग्न हिँडेर २ घण्टा लाग्थ्यो । बूढापाकालाई त ५ घण्टासम्म लाग्थ्यो,’ सदरमुकाम नजिकैको गाउँ भए पनि बजार आउजाउ गर्दा हुने सकस सम्झिँदै अधिकारीले भने, ‘सडक कच्ची हुँदा यात्रा गर्न निकै सकस हुन्थ्यो, धुलो र हिलोले सास्ती खेप्नु परेको थियो ।’

फिदिम–फालोट सडकको फिदिम–सल्लेरी खण्डको १० किलोमिटर सडक कालोपत्रे भएपछि फिदिम पुग्न सहज भएको छ । समयमै फिदिम पुगेर सर्वसाधारणलाई काम गर्न सकिने अवस्था छ । स्थानीय उत्पादनले बजार पाएको छ । उत्पादन खेर जाने अवस्था हटेको छ ।

भारतसँगको सीमा क्षेत्र फालोटलाई सदरमुकाम फिदिमसँग जोड्ने फिदिम–फालोट सडकको नांगीन सल्लेरीदेखि लुदिनटारसम्मको २५ किलोमिटर सडक कालोपत्रे भएको ३ वर्ष बितेको छ तर फिदिम–सल्लेरी खण्ड कच्ची हुँदा यस क्षेत्रका सर्वसाधारणले हैरानी व्यहोर्दै आएका थिए ।

पूर्वाधार विकास कार्यालयले ४ वर्षअघि थालेको फिदिम–सल्लेरी खण्डको कालोपत्र पूरा भएपछि स्थानीयवासी खुशी भएका छन् ।

पूर्वाधार विकास कार्यालय फिदिमका प्रमुख राजनराज रेड्डीका अनुसार जिल्लाको मुख्य सडकको रूपमा रहेको फिदिम–फालोट सडक खण्ड कन्काई पीएस जेभीले ६० करोड २७ लाख रुपैयाँ लागतमा निर्माण गरेको हो । नालीसहित ७ मिटर चौडा सडक निर्माण भएको छ । 

कोभिड–१९ का कारण २ वर्ष म्याद थप गरिएको थियो । आगामी असारसम्म काम सम्पन्न गर्ने सम्झौता छ ।