०९ साउन २०८३, शनिबार
नेपाली कांग्रेसका महामन्त्री गगन थापाले लोकरिझ्याइको कुरा गर्नेबाट प्रभावित भएर चितवनलाई राजनीतिक परीक्षणको ठाउँ नबनाउन आग्रह गरेका छन् । रवि लामिछानेको नामै नलिइ गगनले पाँच महिनामा जनताले चिनिसकेको र प्रत्येक दिन नयाँ नयाँ कुरा आउने टिप्पणी गरे ।
सोमवार चितवनको कालिका नगरपालिकामा कांग्रेस उम्मेदवार जीतनारायण श्रेष्ठको चुनावी सभामा पुगेर गगनले विगतको कुरा बिर्सेर उपनिर्वाचनमा कांग्रेसलाई भोट दिन आग्रह गरेका हुन् ।
‘चितवनलाई कुनै व्यक्तिको परीक्षण हुने ठाउँ हुन नदिनुस । तपाईंको सुझबुझले नेपालको राजनीतिलाई मार्गनिर्देश गर्नेछ’ थापाले भने ।
केन्द्र र प्रदेशमा कांग्रेस–माओवादीको सरकार रहेको र यही गठबन्धन पाँचवर्ष चल्ने भन्दै थापाले चितवनमा बजेटको कमी हुन नदिने बताए ।
‘५ वर्ष यही सरकार रहन्छ । केन्द्र सरकार हाम्रै छ, बागमतीको सरकारमा कांग्रेस छ र चितवनकी मेयर हाम्रो हुनुहुन्छ । प्रधानमन्त्रीसँग टेबल ठोक्न सक्नेलाई तपाईंले संसदमा किन नपठाउने ?’ थापाले भने ।
गगनले बाहिर कांग्रेस हुँ भन्दै हिड्ने र भित्र दायाँबायाँ गर्ने छुट काग्रेस कार्यकर्तालाई नभएको बताए । ‘कांग्रेसको एकजना साथीले पनि दायाँबायाँ तलमाथि नगर्नुस्, खुलेर कतै लाग्नु भएको छ भने तपाईंको निर्णय भयो । बाहिर रुख रुख भन्ने, भित्र तलमाथि गरेमा कसैले नदेखेपनि मनभित्रको हरिले देख्नेछ’ थापाले भने ।
कार्यक्रममा भरतपुर महानगरकी मेयर एवं माओवादी नेता रेनु दाहालले मूलधारका दलले नै चितवनको विकास गर्ने भन्दै आवेगमा आएर भोट खेर नफाल्न आग्रह गरिन् । वैशाख १० गते हुने उपनिर्वाचनमा आफ्ना उम्मेदवारको प्रचारका लागि कांग्रेस उपसभापति धनराज गुरुङ र महामन्त्री गगन थापा चितवन पुगेका हुन् ।
