१२ साउन २०८३, मंगलबार
चाबहिलमा छुरा प्रयोग गरी हत्या गरिएकी निरा पाण्डेका आफन्तले ६ दिनसम्म पनि हत्यारा पत्ता लगाउन नसकेको भन्दै आक्रोश व्यक्त गरेका छन् ।
उनीहरूले (मंगलवार) चाबहिलको सरस्वतीनगरस्थित ‘निरु’ भाडा पसलअगाडि धर्ना दिएका हुन् । बाग्लुङ स्थायी घर भएकी पाण्डेको यही वैशाख ७ गते आफैंले सञ्चालन गरेको पसलमा शव भेटिएको थियो ।
‘राज्यले अपराधीलाई कानूनको दायरामा ल्याउन नसकेकाले हामी आन्दोलन गर्न बाध्य भएका छौं,’ मृतक निराका दाजु यम पाण्डेले लोकान्तरसँग भने, ‘६ दिन हुँदा पनि हत्यारा समाउन सकेनन् । अब हामी आफन्तको मुटु भावविह्वल भएर फुट्न मात्रै बाँकी छ ।’
काठमाडौं उपत्यकाको व्यस्त बजारमा भएको हत्याको पनि वास्तविकता पत्ता लगाउन नसक्नुले आफन्तलाई झन् त्रसित बनाएको उनले बताए । प्रहरीले हुन्छ मात्रै भनेको तर अहिलेसम्म कुनै व्यक्तिलाई पक्राउ गर्न नसकेकोमा उनीहरूको आक्रोश छ ।
‘प्रहरीले भइराछ, हुँदैछ भन्छ, तर केही गरेजस्तो हामीलाई लागेको छैन,’ पाण्डेले भने, ‘राज्यले छिटोभन्दा छिटो हत्यारा पत्ता लागाओस् ।’
सरस्वतीनगरमा व्यवसाय गर्दै आएका जीतबहादुर रोकाले स्थानीय व्यवसायीहरू त्रसित भएको बताए ।
प्रहरीले ५/६ दिन बितिसक्दा पनि हत्यारा पत्ता लगाउन नसकेका कारण अरूलाई पनि त्यस्तै अवस्था आउने हो कि भनेर त्रसित भएको उनको भनाइ छ ।
‘लामो दिन भइसक्यो, प्रहरीले अहिलेसम्म कसैलाई पक्राउ गर्न सकेको छैन । हामी दिनकै पसल खोल्न जाँदा त्रसित हुनुपरेको छ,’ उनले लोकान्तरसँग भने ।
उनले घटनाको दिनको त्रासदी पनि सुनाए ।
‘त्यो समयमा म पसलमा थिएँ । ३ः३५ बजेतिर एकजना ग्राहक त्यो पसलमा एउटा लास रगताम्मे अवस्थामा छ भन्दै आएपछि मैले नजिकैको सैलुनमा गएर त्यो कुरा बताएँ,’ रोकाले उक्त दिनको घटना सम्झँदै भने ।
त्यसपछि स्थानीय व्यवसायीहरू जम्मा भएर प्रहरीलाई खबर गरेको उनको भनाइ छ ।
अहिले त्यो क्षेत्रको मुख्य सडकमा सीसीटीभी क्यामेरा जोड्नुपर्ने माग समेत राखेको रोकाले बताए ।
‘यस ठाउँको मुख्य सडकमा सीसी क्यामेरा नहुँदा हत्यारा को हो भन्ने कुरा थाहा भएन, अब स्थानीय तहका नेताहरूले पनि यसलाई ध्यान दिनुपर्छ,’ रोकाले लोकान्तरसँग भने ।
यता प्रहरीले भने निराको हत्या पसलमै भयो कि बाहिर कतै भन्ने विषयबाट अनुसन्धान भइरहेको जनाएको छ ।
अनुसन्धानमा खटिएका अधिकारीहरूका अनुसार दिउँसो घटना हुँदा अरूले थाहा नपाउने अवस्था कसरी आयो भन्ने विषयमा अनुसन्धान भइरहेको हो ।
‘हामीले मर्डर अन्तै भएको हो कि त्यहीँ भन्ने विषयमा अनुसन्धान गरिरहेका छौं,’ एक अधिकारीले लोकान्तरसँग भने ।
काठमाडौं प्रहरी परिसरका प्रमुख वरिष्ठ प्रहरी उपरीक्षक (एसएसपी) दानबहादुर कार्कीका अनुसार अहिले सबै कोणबाट अनुसन्धान भइरहेको छ ।
‘हामीले सबै कोणबाट अनुसन्धान गरिरहेका छौं । तर अहिलेसम्म ठोसरूपमा केही प्रमाणहरू भेटिएका छैनन्,’ एसएसपी कार्कीले लोकान्तरसँग भने ।
काठमाडौं उपत्यका अपराध अनुसन्धान कार्यालयका प्रमुख एसएसपी डा. मनोज कार्कीका अनुसार प्रहरीले सुक्ष्म ढंगबाट अनुसन्धान गरिरहेको छ ।
‘हामीले प्राविधिक र म्यनुअल सबै पाटोबाट अनुसन्धान गरिरहेका छौं, तर अनुसन्धान भइरहेकाले अन्य कुरा भन्ने कुरा भएन,’ एसएसपी डा. कार्कीले भने ।
निरा वैशाख ७ गते दिउँसो चाबहिलमा रहेको आफ्नै पसलमा रगताम्मे अवस्थामा फेला परेकी थिइन् । काठमाडौंमा उनका दुईवटा पसल रहेका छन् ।
एउटा पसल उनका पति योगेश आचार्यले हेर्छन् । निरु भाँडा पसल भने उनी आफैंले सञ्चालन गर्दै आएकी थिइन् । उनीहरू बाग्लुङको बडिगाड गाउँपालिकाका स्थायी बासिन्दा हुन् ।
‘हामीले प्राविधिक र म्यनुअल सबै पाटोबाट अनुसन्धान गरिरहेका छौं तर अनुसन्धान भइरहेकाले अन्य कुरा भन्ने कुरा भएन,’ एसएसपी डा. कार्कीले भने ।
निराको शव वैशाख ७ गते दिउँसो चाबहिलमा रहेको आफ्नै पसलमा रगताम्मे अवस्थामा फेला परेको थियो । काठमाडौंमा उनका दुईवटा पसल रहेका छन् ।
एउटा उनका पति योगेश आचार्यले सञ्चालन गर्दै आएका छन् । ‘निरु’ भाडा पसल भने उनी आफैंले हेर्दै आएकी थिइन् । उनीहरू बाग्लुङको बडिगाड गाउँपालिकाका स्थायी बासिन्दा हुन् ।
