नेपाली कांग्रेसका सांसद दीलेन्द्रप्रसाद बडूले दार्चुलामा भारतीय बाटो हिड्नुपर्ने अवस्था अन्त्य गर्न सरकारको ध्यानाकर्षण गराएका छन् । 

सरकारको नीति तथा कार्यक्रममाथिको छलफलमा भाग लिँदै बडूले दार्चुलाको तिंकरबाट सदरमुकाम आउँदा अहिले पनि भारतीय बाटोको प्रयोग गर्नुपर्ने अवस्था रहेको बताएका हुन् ।

‘दार्चुलामा तिंकरबाट सदरमुकाम आउँदा अहिले पनि भारतीय बाटो प्रयोग गर्नुपर्ने अवस्था छ’ बडूले भने, ‘योजना बनाउँदा राष्ट्रिय स्वाभिमानसँग जोडिएका विषयलाई प्राथमिकता दिनुपर्छ । समयमा यस क्षेत्रका सडकको निर्माण पूरा गर्नुपर्छ ।’

दार्चुलाको तिंकर सडक त्रिदेशीय व्यापार र रणनीतिक महत्व भएको उनले बताए । यसैले यो सडकको निर्माण छिटो गर्ने विषयलाई प्राथमिकता दिन उनले ध्यानाकर्षण गराएका हुन् ।