२५ जेठ २०८३, सोमबार
प्रधानमन्त्री पुष्पकमल दाहाल प्रचण्डले भारत भ्रमणका क्रममा राज्यमन्त्रीले गरेको स्वागतबाट आफू अपमानित नभएको दाबी गरेका छन् ।
बुधवार राष्ट्रिय सभा बैठकमा आफ्नो भारत भ्रमणबारे जानकारी गराउने क्रममा प्रधानमन्त्री प्रचण्डले औपचारिक भ्रमणमा राज्यमन्त्रीले स्वागत गर्ने पुरानो प्रचलन रहेको बताएका हुन् ।
दिल्लीमा आफूलाई गरिएको स्वागत राजकीय भ्रमणभन्दा कम नरहेको उनको भनाइ थियो । ‘यहाँ कतिपयले राज्यमन्त्रीले स्वागत गर्दा बडो अपमानित भएर आएको भन्ने कुरा गरे, म अपमानित भएको छैन, सम्मानित भएर आएको महसुस गरेको छु’ प्रचण्डले भने, ‘दोस्रो पटकको भ्रमण स्टेट भिजिट थियो, त्यो बेला विदेशमन्त्री सुस्मा स्वराज नै आउनुभएको थियो । अफिसियल भिजिटमा राज्यमन्त्री हो अझ कतिबेला सहसचिव आएका छन् । त्यतिबेला कसैले अपमानित ठानेनौं, प्रचण्ड आएको बेला राज्यमन्त्री भन्यौं।’
एयरपोर्टबाट जाने क्रममा सम्पूर्णरूपले स्वागत गरिएको र त्यो स्वागत राजकीय भ्रमणभन्दा कम महसुस नगरेको उनले बताए ।
जेठ १७ गते प्रचण्डलाई भारतमा विदेश राज्यमन्त्री मीनाक्षी लेखीले स्वागत गरेकी थिइन् ।
